Oté

Dopi lo gro sofa pou La frans ziska pti ban … La Rényon ? Asiz a-tèr ! Épi shttt ! Fèrm la gèl !

Justin / 21 out 2015

Zot i souvien zistoir té dann liv Dumas. Pétèt oui, pétèt non ! Sé lo zistoir d’in roi k’i sava la shas é li pèrd dann la foré. Li trouv la kaz in sharbonyé, li rant épi li asiz dsi lo sèl tabouré ké nana. Sharbonyé i di ali : « la pa késtyon ! » épi li arpran son tabouré é li lo roi, li na ka asiz a-tèr. L’èr-la li di lo roi : « An droi é an rézon sharbonyé lé mètr dann son mézon ! ». Listoir i fini la avèk in désin : in pti boug mal razé sal vèy pa koman asiz dsi in tabouré é in gran roi asiz a-tèr. Pou kosa mi di sa ? Pou farsé ? Non pa si tèlman.

Pou koué ? Pars zot i koné la COI, zot i koné osi lo z’APE ! Figuir azot lo bann manm la COI la di èk la Frans, so zistoir z’APE i trène tro é i fo alé pli vite pars bannzil lé présé manz z’ot par d’gato dsi nout bos anou rényoné. Lé sir banna, dan l’éta ké zot i lé zordi, i sa pa konkirans La France, mé zot i pé tir inn-dé gob dsi nou é fout a-tèr nout prodiksyon intèryèr pou tout lo bann rézon ké zot i koné. Zot i koné so z’afèr d’pri koutan, zot i koné so késtyonn protéksyon sosyal, zot i koné osi koman dopi troi syèk édmi lo péi dominèr la mète shène dann nout pyé.

An pliské sa, pou lès la komisyon éropéène épi bannzil lib, La Frans la di in éstati d’obsèrvatèr l’asé pou li. A bon ? Ou i défann pan ou don ? Ou vé pa blok in n’afèr va fé anou d’tor ? Mèrsi la mèr patri pou tout l’amour ou na pou nou ! Ébin nou ? Nou, i anparl mèm pa d’nou. Konmsi i di alé fé oir anou pli loin. I diskite pa avèk nou, i domann pa kosa ni anpans.I kont solman dsi nou pou gingn lo kou dann l’ané 2017.
Donk La Frans i sort dsi son gro sofa, li asir dsi ti-ban é nou... Asiz a-tèr si ni vé épi shttt ! Fèrm la gèl.

Nb : Isi i anparl zéléjksyon réjyonal. Sa lé inportan sa, mèm si na in la dann nout kolé é in pé i aral dési firamézir ziskatan nout lang va sort déor.


Kanalreunion.com