Oté

Dopi vitam eternam, konm in kotèr dsi in zanm de boi !

Justin / 5 séptanm 2016

Kan ou i sava oir médsin, li komans par poz aou késtyon dsi koman ou i san out kor. Aprésa, li pran out tansyon, li soupèz aou, li ékout out kèr bate, épi li rogard dann fon out gozyé, out dann out rokoin z’orèy. Li fé marsh aou zyé fèrmé, zyé rouvèr épi tazantan li donn aou in radyo pou fèr, épi l’analiz lo san épi l’irine. Pou kosa li fé sa, Pou li oir si ou lé bien si ou lé pa bien -an zénéral si ou i sava oir médsin sé ké ou nana traka dann kor.

Aprésa, si li trouv dé shoz ké lé pa normal, li rod pou kosa : sa i apèl lo dyagnostik é lo dyagnostik sa sé lo travaye doktèr pars lo rèstan, n’inport ki i gingn fé. Tout l’ar lo médsin sé d’ariv a konète out maladi é aprésa sèy songn ali, pars sa sé son rézonn d’viv épi travyé. Mi pans ké an go-an gro, zot lé dakor avèk moin késtyonn songn la maladi d’moun.

Astèr kosa k’i éspas kan sé pa in moun mé sé in péi. Mi pans lé in pé parèy. Pou koué ? Pars, dann in promyé tan, lo l’éspésyalis i vé konète koman lo péi i lé késtyonn l’anploi, késtyonn kroisans sansa dékroisanns, kèstyonn nivo d’vi étsétéra... Aprésa i pé konplète lo dékripsyon par inn-dé l’analiz an profondèr, dann tèl ou tèl domenn. Kan lé fini dékrir l’éta lo péi, aprésa i fé in dyagnostik. I réponn la késtyon : pou kosa lo péi lé randu konmsa ? Kan i koné sa bien, l’èr-la i rode lo manyèr pou trète lo maladi sansa lo bann maladi lo péi.

Alor si ou i fé pa in démarsh konmsa, lé riskab ké lo trètman lé pa éfikas ditou vi k’i koné pa lo maladi, sansa lo bann maladi. Nout parti, pou son par, li fé la démarsh dann sans k’i fo : li nonm tout lo bann paramète pou lo déskripsyon, li donn in nom lo maladi : lo néokolonialis é aprésa li propoz bann solisyon, lo 25 poin dann son program.

Ala la fason k’i fo fèr, mé an fas de nou napoin pèrsone, konm parti, nana so démarsh – la si tèlman ké lo bann romèd lé z’ot i rès, dopi vitam éternam, konm in kotèr dsi in zanm de boi.


Kanalreunion.com