Oté

« Dovan z’étranzé, lo dyab i kashyète son ké ! » - In kozman pou la rout

Justin / 30 séptanm 2015

Sa in kozman pou dir anou konmsa, lé pa tro fasil konète demoun pou vréman. La plipar d’tan ni kroi konète azot mé ni koné arienk in l’aparans. Mèm in malfondé i pé amontr ali dsou in bon zour. Sirtou kan sé in l’ipokrit, éspèr dann l’ipokrizi. Sa sé in n’afèr, mé fransh vérité sé dann in sistyasion difisil, mèm kan nana in diskisyon sansa in dispite ké ou i rann aou kont in moun lé pa konm ou i kroi ké li lé. I di pa sé kan ou lé dovan lo mir k’i rokoné lo mason ? Sa lé bien vré. Astèr nou mèm, ni koné kisa ni lé, pou vréman ? Sa lé bien difisil é si ni koné pa nou nou-mèm, koman ni pé konète lé z’ot. Konm di lo kont sa sé in l’ékoisyon inposib. Kosa zot i anpans zot ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké rant-rant, ni pé z’ète tazantan dakor rantre nou.


Kanalreunion.com