Oté

Dsi l’pon di nor, in bal lété doné !
Ala s’ké sé bann zanfan ostiné !

Justin / 9 juillet 2012

Méssyé Didier èk son mazorité dann Konsèy réjyonal i sort fé in lopérayson kominikasyon. Zot va di, ankor in foi Justin i trouv a rodir dsa, pars so kou issi sé la droite k’i bate dsi son léstoma ? Bin, moin la fine di pou kosa moin lé kont. Pou dé z’afèr, pétète troi ! Inn, li fé pèrd anou lo trin é lo trin sa sé in n’afèr nora été bien nésèsèr dann in Rényon in milyon z’abitan. Dé, pars, dann fon mon kèr, mi koné pa si sa lé fézab pou vréman. Mazine in kou in tsounami, sansa in gran rad’maré i palank lo z’afèr dann fon l’oséan. L’èr-la, Rényoné sar bien aranzé : kontonyé pèy in z’afèr la pi la, épisa touf in koma sirkilatoir. In troizyèm rézon, nout natir lé frazil, é mi pans pa na l’droi zoué ansanm konmsa.

Astèr, alon maziné banna na rézon : lo rout litoral sis voi i kout ar mèm pa in milyar-édmi (lo gran patron la di 1.499 milyon… in brin la paye !), nora mèm in voi pou lo trin, son bann poto vayan va rézis lo pli gro mèr k’nana, la natir i souf ar pa. Demoun sar kontan é méssyé Didier sar béni par bondyé lo tou-otomobil. Nora in moniman ékstra dan la mèr. Mèm demoun l’Amérik va déranjé pou oir. Sar mèm pli intérésan, dizon ké lo bozon de Higgs, dèrnyé mayon la shène pou détak la port Bondyé. Ala lo mèrvèy an parmi lo bann mèrvèy. Ala, konm di lo kont, lo uityèm mèrvèy di mond. Méssyé Didier, mi tir aou mon shapo !

Soman voila, mi kroi pa ditou in n’afèr konmsa lé bon pou La Rényon mé vi k’tout lé programé, vi k’ lé prévi kan i komans é kan i fini, mi pans lé zis tan pou prépar lo linogirasyon. Par égzanp, donn in gran bal, ék in fé d’artifis, dsi lo rout sis voi. Lé zis tan pou lo komité komans travay, mé tansyon pangar ! Tansyon i fé konm lo pon di nor, si tèlman bien ronomé d’apré in dans-rone marmay lontan téi fé dan la kour lékol : lo troizyèm dans, lo pon la éfondré, ala s’ké sé bann zanfan ostiné !*

* Ostiné, sa i vé dir "tèt dir" é an parlann tète dir, nana inn i trone dann Konsèy réjyonal.

Justin


Kanalreunion.com