Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Accueil > Chroniques > Oté

Dsi la késtyonn z’anploi vèr an moins : ’Bann koshon.com’ !

vendredi 17 août 2012

Mi souvien dann la kanpagn pou zéléksyon réjyonal Didier Robert l’avé fé in sakré promès. Par fète, dsi la késtyonn promès, mi pans zot i koné sak défin Edgard Faure (1908-1998), in gran politisien, téi di ? Li téi di konmsa : in promès i angaj pa sak i promète, mé sak i kroi lo promès. Sanm pou moin Didier Robert i doizète in gran zélèv lo gran om moin la mark lo nom anlèr la. Donk, dann la kanpagn zéléksyon réjyonal, si mi tronp pa, li l’avé promète dis-mil anploi vèr. In sakré promès sa !
Solman lo tan la pasé, é lo dis-mil la pa fé pti, mé, an kontrèr, la rédui konm in po d’shagrin : na poin dis-mil, la zamé an avoir. Zordi, i arès arienk mil-ui-san, é pli pir la Préféktir i sort di va kass lo shif an dé é va arète arienk nèf san. Poitan tout demoun i pé oir sak bann z’anploi vèr lé fine fèr La Rényon. Si na désèrtin z’androi lé bien aménajé, gazon bien koupé, sé par zot, sé par bann z’anploi vèr épi bann asosyasion k’i anploy azot. Mé i fo kroir, lé pa pou sa, na la rokonésans anvèr zot, vi k’in pé lé paré pou tir in tré dsi bann métyé-la. Aprésa, mi antan déza in pé apré di La Rényon lé sal, l’anvironeman lé mal protézé, papyé i trène partou étsétéra, étsétéra la ké lo ra.
Mi koné désèrtin z’anploi vèr i di partou zot i èm bien zot métyé, mé i fo kroir sa lé pa inportan pou bann gro vaza i diriz La Rényon. Promès sé dète ? I fo kroir sa la pa vré pou toulmoun. La pa vré pou bann gran prométèr pti donèr.
Aprésa, va rès solman pou désèrtin lo travay intérésan k’ i konsist a kont lo bann ta la salté épi alé mark sa dann site :"bann koshon.com". Lo vré koshon lé pa difisil pou trouvé, kisoi la Préféktir, kisoi la Piramid invèrsé. Kisoi ankor an parmi bann tète do zèf i fé la loi dann bann ministèr.

Justin


Un message, un commentaire ?

signaler contenu


Facebook Twitter Linkedin Google plus