Oté

« Dsi n’inport kèl pyé fig i mète kostime don ? »

In kozman pou la rout

Justin / 22 févrié 2016

Sa in kozman moin la antann samdi matin, kan in dalon té apré krétik la promosyon in moun l’a gagné. Biensir ké pou li, la pèrsone téi mérit pa. In kostime dann son l’éspri sé in bon mark dann l’éshèl sosyal. La pa n’inport ki i mète kostime : sa lé rézèrvé pou désèrtin-dann pasé té ankor pli vré ké koméla. Sanm pou moin provèrb-la lé dann la ségrégasyon sosyal an plin : in linz, in kostime, in koulèr, mèm in shapo, dann tan té i indik kèl sé out grad dann la sosyété. Koméla, sa la fine éfas in pé : la prèv ? Marsh dann shomin aprésa di amoin si ou la trouv in amontrèr, in z’ouvriyé, sansa in moun i travaye dann komèrs. Ou i gingn ar pa ! Lé vré pou bann madam galman. Kosa k’i rès ? I rès k’in moun inkapab i doi pa z’ète plasé dann in grad i mérite pa li pou fé in travaye li gingn pa fé . Mi koné pa kosa zot i anpans, mé moin, pèrsonèl, moin lé asé dakor avèk kozman-la.

NB - Pyé fig ? Té konmsa nou té i apèl banane na poin si lontan ké sa.


Kanalreunion.com