Oté

Dsi nout fron lé pa marké "bone poire", si mi tronp pa !

Justin / 13 avril 2013

Zot i koné, koméla, nana in nouvo konpagni laviyon rant la Frans épi La Rényon ? Zot i ansouvien konpagni-la té i propoz bann voiyaz alé-rotour pou 490 €. Demoun la sote dsi lokazion, pars in gran voiyaz pou so pri-la lé intérésan. Sirtou ké lé zot konpagni i tap in pé dan la tète. Sa toulmoun i koné vi k’mi antann souvan bann koréspondan radyo pèrkal apré di bann voiyaz rant La Rényon épi la Frans lé an parmi bann transpor sak lé pli shèr. Domann pa moin koman zot i koné sa, koman zot la kalkil in n’afèr konmsa... vré, pa vré, tout fason, mi vann konm moin l’ashté.

Promyé sirpriz lo 490 € té konm in zapèl sa, pars na trépé biyé pou so pri-la. finalman, dann moi d’mars demoun téi doi kontant azot in voiyaz pou 616 €. An rézon, la pa tro shèr, mé par rapor o pri d’zapèl nana kant mèm in diférans. Koméla, nou lé moi d’avril é lo pri i komans goumanté. Kan v’ariv moi d’zilyète lo pri sar par-la 1400 €. Tousala ? Bien sir pars i paré sé la ote sézon. Pli shèr lé zot konpagni ? Biensir pli shèr solon sak i lir dsi internet. L’èr-la in késtyon i vien dann mon tète : si lé vré i pé fé la réklam pou in produi, si i pé dir sé in téknik komèrsyal, sak banna i fé lé in pé grav la, pars nou lé loin rant lo pri zapèl é lo pri réèl. Mi pé dir azot, moin la tonm a la ranvèrs (dsi mon boi d’k, an parlan par réspé !) é konm moin la mazine linternet té apré roul amoin, moin la télé fone la konpagni. Bin la réponn amoin bann promosyon i aplik pa kan sé la sézon shèr. Mi souète moin té mal informé, pars i arsanm bien in foutaz de guèl.

Sa i rapèl amoin lo projé air Ausrtral dann tan Ethève té lo pédézé. Zot i souvien l’avé prévi dann l’aviyon Air-Bus 380 fé voiyaz demoun pou 500 €. Bien antandi mésyé Didier la pass par la, é konm touzour li la kass lo projé é li la akabl anou dsou in takon la propagann pou ésplik Paul Vergès l’avé tor, lo projé té pa bien fislé, é la konpagni té i sar kapoté dirékto. In ta d’moun la bate la min é konm bann télé, radyo épi gran zournal la bate tanbour la dsi, l’opinyon la pans mésyé Didier avèk son dé soumarine i sort Air-France l’avé rézon... La vérité na ankor in gran shomin pou fé, malérèzman, pars, sanm pou moin, na in pé i pans Rényoné lé bon pou roul dan la farine. Poitan, dsi nout fron lé pa marké "bone poire", si mi tronp pa.

Justin


Kanalreunion.com