Oté

E la invant lékritir !
Mi kroi k’sa lé bon po nou !

Justin / 12 novembre 2013

An 1997, moin la ginye in kado, moin té an konzé, in kamarad i of a moin in liv “Chansons longtemps”*.

Li dédikas : « Mi koné pa si ou nana liv là ! sat mi di sékifo i sava loin, i pèt an flèr tan pir ki pé ! ».

Ladan, 21 sanson kréol de P’tite fleur aimée a P’tit case en paille, mé sirtou foto nout pli gran mizisyin, bann lorkès… kan mèm, ou na d’mal imazine avan 1920, navé poin Ti flèr fané ke Fourcade la ékri !, kavan Luc Donat, navé poin a “Lamour lé dou” !

E, si vi souvien, ah nénére, Canne mapou, Mon doudou, Roulez mon zaviron.

Zordi, marmay lékol i ginye fasilman ékri lo bann parol o tablo é aprann nout patrimoine mizikal.

Si mi sant Lès a moin maryé, in linstititèr i ginye mont in skètsh.

Parl pa si mi rant dann répertoir Madoré : « moin la pa zanfan batar, moin la pa zanfan sinoi, moin la pa zanfan zarab, moin zanfan sénégalé »  ; tout nout listwar nout péploman lé dan dé-troi ti parol, nou lapré sélébré lo 350èm aniversèr nout pèp, alala in nafèr fasilman aksésib po lo zèn zénérasyon !

Ou i sort Roulé mon zaviron ? In bann zésklav i vé artourn dan zot péi ? Nou konétra zamé si zot la arivé Mozanbik, Komor, péi Madékas.

Ek sa, na d’parol i rakont égzakteman lo zafèr, ékout sa — mon papa té i sant sa kan moin té pti : « A mésyé Zilo, nana gayar bèl kaf larivé, sa i manz pa, i argard avèk lo zyé simploman » . Pa bezoin mi fé a zot in désin !

In réalizatèr sinéma i ginye tourn in film tou d’suit.

A la invant lékritir ! Mi kroi k’sa lé bon po nou !

*Hi-Land océan Indien

Justin


Kanalreunion.com