Oté

E la invanté limn nasyonal, konm la invanté in drapo !

Justin / 11 mars 2014

Nou la fine rant an kanpagn, dizon pa ofisièl, mé preské ; pars di pa moin ou fé in diférans ant in kanpagn ofisièl é in kanpagn lé pa ankor ofisièl, koué i sanz dan lo ton, dan lo mo, dan lo zidé ou vé fé pasé dan la tèt lo moun lé dovan ou ; lé vré in rényon politik la poin tro déba !
Lo déba té avan dan lo group kandida.

Donk inn i komans kozé ; in lanimatèr i pas la parol lot, li prézant inn tipé avan lintervansyon, la persone é an minm tan kèl tème li sar dévlopé, tou sa la.
Lo rényon i déroul, inpékab, zisko kandida promié la lis, li ardéroul tout dan lord, li responsab programe foutor… aplodisman, rényon fini mi komans lévé mon fès i komans biin krazé si béton, mon do biin bloké mon janm an fourmi- ankor moin té asi lé zot té doboute -…
Bayoun baya mi koné pa koué la spasé dann fon laba dan lo « staf » mi antann alon zanfan de-la-patri-i-i-e, lo zour do gloir é tarivé.

Oté, mon san la fé in tour ; kouék la rivé ! Ki la lans so sanson ; nou lé pa stad Frans ék Frans-Brézil footbal koup du mond !
Dizon moin in rényon UMP ; é lé pli réaksyonèr la pu égzisté ; moin noré préféré linternasyonal ou lo sifon rouz de Fugain !
« …Mi san a moin plu fransèz ke rényonèz… »la répons la persone la lans so linm nasyonal la Frans.

Totos, ou sobat po lidantité réyonèz, ou batay po fé vot loi po rokonèt lo kréol, lang, patrimoin nout péi,nout konpatriot, la Rényon nout péi.
Ki lé nout drapo la Rényon si batiman piblik ? Mèt in bon séga ou in bon maloya po fini nout rényon politik isi.
Res dan nout kiltir…nou lé pa laba !

 Justin 


Kanalreunion.com