Oté

E lonm la invant zouti… alor ke lu navé zouti natirèl !

Justin / 25 avril 2014

So matin moin tapré rogard mon ti mai la pré pousé ; o, lé pa tro gran ; fine ariv la grandèr in min a pé pré ; konm lo zépi lavé zermé, dé foi moin té oblizé kas lo zépi an plizir morso, larg konm sa danl trou ; donk, la pous par bouché, par paké, lé pié lé in pé kolé séré, ék sa na tro danl minm trou ; i fo dégazé, roplanté... ; tansyon kan ti aras ; aras dousman ék tout son rasine ! Minm pa sir li va ténir, minm si moin la mèt in péd lo larozoir moin la porté…

Ek kèl zouti mi sar fé sa ? Ti kroi moin na roplantoir ? Kréol i di fèr-grat ! Mi fé sa èk in zouti natirèl mi port èk moin dopi mon nésans : mon dé min !
Ti vé armèt in pé la tèr po bité toul tour, konm sa lo bann rasine i giny plis la fors, lo pié pli solid po ténir kont lo van ; ti kroi ti giny fé sa èk pios ?
Tro frazil, toué va kraz lo pov ti pié mai ; toué lé oblizé itiliz ton 5 doi ; pas bien ant sak pié, pous la tèr dousman dousman ; kal a li o milié lo ron, otour sak ti pié ; api a li toultour ; o moin li tien dbout !

Toué la pa bézoin rato ; ti ékart ton 5 doi ; ti giny in rato natirèl.
Ti vé mèt fimié ; toué la bézoin in pèl ? Rozoinn ton 5 doi ansanm ; toué néna in pèl lédos toud suit : pa bézoin alé asté.
Ton dé min ansanm i fé in godé po lèv fimié dann sak ; masine èk godé lès po bann kamion bèn ordir vert !
Lonm la invant zouti kan li la agard son dé min… sof si i fo mèt dan la sann so… dan lo ros i blès a ou, ti travay in zourné dann kap po dékapé !
Moman doné ti sra oblizé pran zouti kinkayri ; sinon, bonpé zafèr ti giny fé ék ton dé min, ton10 doi…
Di pa : « a, mi giny pa fé rien, moin la poin zouti » ; souvan si ti ésay ti giny ; daiyèr, pa kapab lé mor san esayé ?!Vré, pa vré ?

 Justin 


Kanalreunion.com