Oté

É si lo pti té i tape lo gro ?

Foutbal

Justin / 28 juin 2010

Mi koné pa si zot lé konm moin, shakinn son l’opignon ! Pou mon par, dann toute konpartiman la vi, listoir, l’aktyalité, mèm dann l’éspor, mi pass mon tan pou révé, pou souété, lo pti i bate lo gro. Fransh vérité, moin lé kont l’inzistis é oir lo gro gagné toultan, sanm pou moin sa sé in l’inzistis. Donkalor, mi suiv la koup di monn foutbal an souétan bann gran, bann gro i ramass in galo, i gingn in batlavé. Na dé foi, sa i ariv, souvan dé foi sa i ariv pa, pars lo gro, la plipar d’tan lé byin roganizé, lo pti an kontrèr i mank ali lo moiyin, i mank ali la roganizasyon.
La pa tousala, mé samdi soir moin lété kontan pars Ghana la bate bann z’Amérikin. L’Amérik sé in gran zéan, é Ghana sé in pti, kisoi késtyonn lékonomi, kisoi késtyonn popilasyon, kisoi késtyonn nivo d’ vi, épi nana ankor lo kolonyalis banna la sibi.
Alor, moin la mète a moin a révé. Nana ankor bann p’ti dann la koup, é nana ankor bann gro. Alon mazine in kou bann ti i gingn an uityèm, an kar, an domi épi an final. Alon mazine solman sa ! Mi paryé pa, pars lo paryaz i aporte la movèz shans. Mazine solman, inn rant bann ti i gingn an uityème, an kar, an domi épi an final. A moin lé sir na poin aryink moin sar kontan... lo zour ousa lo pti va tape lo gro.

Justin


Kanalreunion.com