Ebola : si gouvèrnman i bouz pa, i fo mète do boi avèk li !

Lé ga, zot la fine antann parl lo viris “ébola” ? Sa i fé déga dann dé-troi péi l’afrik dé l’ouès é d’apré sak i di na d’ot péi ankor i sava konète so dézagréman. la plipar sé bann péi mizèr, touléka nana in bonpé d’moun mizèr dann zot popilasyon. I paré mèm maladi-la la fine sote la mèr vi k’désèrtin moun i trap lo maladi dann bann péi konm l’Espagn, La Frans épi d’ot ankor. Soi zot la trap lo maladi dann bann péi ataké, soi zot la frékant in moun té ataké dann bann péi l’Afrik, osi in famiy demoun ataké...

Na in bonpé késtyon lé bon pou pozé dann in ka konmsa. Promyé késtyon : koman anbar shomin viris-la si toulmoun lé otorizé voiyazé.,. Viris la pa bézoin pas-por, la pa bézoin viza non pli. Dézyèm késtyon : si na in vaksin, i fo vaksine tout demoun. Lé itil é kisa na lo moyin pou moiyéné ? Sa sé in késtyon lé pa fasil pou réponn. Troizyèm késtyon : déga dann l’ékonomi nora sa, pa dann bann péi l’érop ou sinonsa l’amérik mé dann bann péi l’Afrik. Konm i di, lo prodiksyon intèryèr i sava dégringolé par lo maladi sansa par lo tapaz in pé la fé. Sé plito lo tapaz mi pans !

Astèr kosa i pé éspas pou nou rényoné ? La maladi va kontourn anou san toushé ? Lo minis la di La frans lé paré pou pou défons lo viris épi la amontr bann kostime kosmonote, bann mask oksizène, bann médsin, infirmyèz an pagay. Ebola, ton poi lé o fé ! Di vitman, mé kroi pa tro ! Arsouvien azot lo kou d’chikungounya ? in minis la di, sa in apès grip, in somènn épi li lé bati. Bati ? A ouète ! Dé san sinkant mil rényoné la gingn sa é ziska zordi in pé na ankor doulèr é sak lé mor lé bien mor. Donk antansyon é si gouvèrnman i bouz pa i fo mète doboi avèk li.