Oté

Ek lo minis kominis shakinn néna son léstati an béton !

Justin / 12 zanvié 2016

An so moman i sélèb lo vintyinm anivérsèr la mor lo prézidan Mittérand, konm di bann la ot, shakinn i sava de son kouplé, shakinn i rakont l’istwar a son manièr. Nou va di pou nou, pou nou travayèr, pou moun an ba, bann pli démini, sak la mark a nou lo plis sé lo promié débi d’manda, rant 1981 é ziska 1984 dizon. Té falé mèt an plass lo program komin désidé rant sosyalis èk kominis é dizon pou lo kou, nou la trouv plito nout kont.

Pou travayèr, ni rotyin la bèss déza laz légal pou la rotrèt a 60 an, la sominm travay la pass de 40 èr a 39 èr, in sominn konzé payé an plis san mayé, la libèr bann radio lib, la aboli la pèn de mor, la goumant lo SMIG an bon pé d’fwa, la fé in lwa d’si lo drwa travayèr, la régilariz bann zimigré an poundiak. La pou vréman de 1981 a 1984 ni pé di té in politik de gosh. Lavé 4 minis kominis ansanm avèk.

Mi an souvyin dan lé 4 minis kominis navé lo minis la fonksyon piblik, é bin li la bétonn in léstati pou bann moun lavé pwin. Lavé solman in sèl fonksyon piblik èk aryink fonksyonèr léta. Li la fé in léstati pou bann moun i travay la kominn, konsèy zénéral, pou bann koléktivité, i apèl sa la fonksyon piblik téritoryal. Ek sa li la fé osi in léstati pou bann moun i travay lopital, la fonksyon piblik ospitalièr. Boudikont zordi èk lo program komin, èk lo miniss kominis shakinn néna son léstati an béton !


Kanalreunion.com