Oté

Ekonomik, sosyal, anvironmantal
Oui ! Mé obli pa lo kiltirèl !

Justin / 24 out 2012

Mèrkrodi apré midi, nout parti la tienbo in konférans de près pou koz dirèktoman avèk François Hollande, pou rapèl ali sak li la promèt dan la kanpagn z’éléksyon prézidansyèl. Sa sé in n’afèr mi konpran bien pars in prézidan nana si tèlman z’afèr pou fé ké si i bouz pa, lé riskab obli in pé dann ta. Kréol i di souvan-défoi : "Z’anfan i plèr pa i gingn pa tété". Mé moin mi èm pa tro kozman-la, mi préfèr di : "Kréol i réklam pa i gingn pa son du".

Sanm pou moin, sak i di sé isi, dan La Rényon, k’i fo fèr in gran sobatkoz dsi nout l’avnir plito k’aral anou dann Pari. Biensir, pars si i sava maye ansanm tout bann péi l’Outre-mèr, moin lé sir é sèrtin sa va fini par in manzé koshon inkroiyab, in vré zanbrokal. Si tout péi lé diféran, i fo in diskisyon dsi shak péi, dan lo péi. I fo in gran diskisyon k’i doi port dsi nout l’ékonomi, dsi nout sosyal, dsi nout l’anvironman... dsi nout kiltir.

Pou kosa ? Pars sak i fo pou nou i fo pa forséman pou in n’ot péi, é sak i fo pou in n’ot péi lé pa forséman bon pou nou. Arzout èk sa, pou kosa ni vé trouv in solisyon global ? Pars lo problèm lé global. L’ékonomi, dakor ! Mé lo sosyal, sa i marsh ansanm. L’anvironman alor ? Li osi, i fo li lé an parmi. Tanka la kiltir, sa lé kapital pars, pou moin, li nana in konsékans dsi l’ékonomi, dsi lo sosyal, épi dsi la protéksyon l’anvironman. Shakinn son tour i azi dsi la kiltir.

In l’égzanp : lo trin. Kisa i pé di li lé pa inportan dan l’ékonomi ? Dan lo sosyal galman li lé inportan, rapèl azot ti trin lontan ! Dan l’anvironman, in moiyin transpor prop sa lé myé k’in transpor i sali la natir. La kiltir alor ? In trin sa i modifyé la vi d’moun, i pèrmèt trafik dan lo péi, vizit mizé... Donk si i fé in gran sobatkoz pou La Rényon, moin lé dakor ! Si i parl l’ékonomi, lo sosyal, l’anvironman, moin lé dakor. Mé obli pa la kiltir kant mèm !

Justin



Kanalreunion.com