Oté

El Hierro i amontr shomin i fo pran, la rout i fo suiv, lé pa défandi fé parèy !

Justin / 30 zwin 2014

Zot i koné El Hierro ? Mi pans si zot i lir témoignaz, zot i koné l’il-la. Sa i apartien l’Espagn é li lé dann Kanari, an plin dann milyé l’oséan. Li lé pa bien gran, 278 kilomèt karé par la. Na poin bonpé d’moun dismil moun par la. Na in bonpé touris i sava la-ba épi sirtou li lé koni pars l’unesco la klas ali konm in rézèrv la biodivèrsité. Lé déza bien, mé figir azot na dé-troi zour banna la rouv in santral éléktrik révolisyonèr… si tèlman ké lo péi a partir d’finn l’ané va fé asé léstrésité pou li tousèl, donk li sar otosifizan. Moin lé sir mo la i di azot kéksoz, pars la réjyon, dann tan Paul Vergès la fé in plan pou rann nout péi parèy, mé l’arivé sak zot i koné, é pa zordi pa domin nou va trap sa nou osi.

Donk dann El Hierro i sort rouv in santral éléktrik, li asosyé l’énèrzi do lo désalé avèk l’énèrzi lo van. Pou l’énèrzi lo van sé in bann zéolyène dan la mèr. zot i désale l’o d’mèr pars lo péi la bézoinn lo. Avek sa i ranpli in promyé basin l’altitid sinkant mète par raport lo nivo la mèr. Pli an o nana in n’ot basin, laltitid 700 mète. Kan i konsome pa tro kouran, i fé mont dolo dopi lo basin pli ba, ziska lo basin pli o é kan la bézoin kouran, lo d’an o i désann pou fé tourn bann tirbine é pou donn kouran demoun. I pé pa dir banna, konm krab na la taye dan la tète, an kontrèr i pé di sa in bann moun i fé travay la tète... dopi trant z’ané zot i kalkil sa épi zot i dévlop zot plan.

Pétète zot i pans sa in sort gadzète, mé zot lé dan l’érèr pars figir azot nana sisan milyonn moun i rès dann bannzil é so sisan milionn moun i pé ète intérésé a fé konm i fé El Hierro. Donk zot i oi sa in n’afèr sèryé é moin lé pliské sir ansanm in bouké l’énèrzi prop na moiyin fé l’otonomi dann l’énèrzi. Dizon avèk l’énèrzi volkan l’énèrzi la mèr, sèt lo van, sèt solèy sèt l’o la rivièr, nana moiyin pou moyéné. Donk El Hierro i amontr shomin i fo pran, légzanp i fo suiv..akoz pa fé konm zot.

Justin

NB : Dann l’osén indien La Rényon té bien parti pou ète in modèl é nout poinn vizé l’otonomi énèrzétik lété - é, lé lé touzour - in bon légzanp pou bannzil. In n’ot afèr El Hierro nana son gouvèrnman otonome, nana in gouvèrnmn dan la provins épi in l’azans pou produi léstrésité donk lé pa étonan, zot la bien amenn zot projé pou fini par ariv o bi. Pars biensir, san la volonté i gingn pa fé arien é la volonté san l’otonomi sé in zéro la gosh in shif.


Kanalreunion.com