Oté

Epi nana Raïmina, brilé-mor dann son somèy

Justin / 30 zwin 2011

Pou komansé, nana l’Etat k’i raz la pinte la LBU, ané apré ané. K’i préfèr défiskaliz la kaz pou jan bien plito ke pran son résponsabilité dann lojman sosyal. Aprésa nana bann promotèr k’i dépans san konté pou kapar bann térin, pou fé la kaz pou jan nana lo pourkoi, épi i profite la défiskalizasyon épi i kapar in for pri bann térin, pétète noré pi fé lojman sosyal. Nana bann sosyété miks ou lé a-dmandé kosa zot i fé pou lojman demoun mizèr. Nana osi in bann minisipalité i kour déyèr lo mank lojman san gingn ratrap ali zamé, mèm si li réspèk lo kota vin-pour-san lojman sosyal k’i mète anlèr lo plan pou aranj la kaz demoun.

Epi, nana Raïmina brilé-mor dann son somèy.

Aprésa, nana o-bout shomin Virapatrin in group kaz an boi-sou-tol éksopré pou bann Maoré k’i vien La Rényon pars zot i pans nout péi sé in péi d’Kokagn, kaziman in nouvo paradi. Armète èk sa in propriyétèr bidon-vil k’i jur la min dsi lo kèr ké lo kaz an boi-sou-tol lété konform, épi si li loué kaz-la pou sète-san-éro par moi, sé ké sa sé son gagn-pain. In propriyétèr ki koné pa pou koué son kaz la brilé. In propriyétèr k’nana la konsyans trankil, mèm si moi d’févriyé, in marmay sizan la bril dann in kaz mèm akabi. An plis ké sa, nana dé-troi somenn in kaz parèy la brilé.

Epi, nana Raïmina, brilé-mor dann son somèy.

Arzout èk sa in bann moun — ti-kolon biensir ! — solidèr la famiy ; Nana mèm in pé i mète z’ot vi an danzé pou sokour lo moun, pou sèy tin-n lo fé ; Nana lo sèrvis insandi k’i ariv pli vite posib ; Mé pli vite posib, pou in kaz konmsa, lé déza tro tar. Nana in madam k’i konpran pa sak i ariv ali, k’i plèr tout larm nana dann son kor ziska pétète son zyé i sèk a-fors pléré.

Epi nana Raïmina, brilé-mor dann son somèy.

 Justin 


Kanalreunion.com