Oté

Er-Ostral :
Aprésa, i vann tout ?

Justin / 13 juillet 2012

Apré lo kou d’l’akordéon dann Er-Ostral moin la lir dann zournal, sé bann koléktivité té i pran lo pouvoir dan la konpagni. Bien antandi, si lé shoz i spas konm l’apré spasé, na arienk SEMATRA lé kapab an avoir lo moiyin pou gonf lo kapital la konpagni. Soisant-dis milyon, sa i trouv pa sou la pat shoval, donk lé for posib tout lo l’arzan, sé la SEMATRA sar blizé trouvé. Sirtou apré lo kou d’l’akordéon, pars mi oi pa kisa i sava pran lo risk mèt son l’arzan la-dan, si li lé riskab pèrd près san pour san konm bann pti z’aksyonèr épi konm lo pèrsonèl la konpagni. In n’afèr konmsa i dékouraj, sa lé sir.

Kan sar fine rogonf lo kapital ? Kan la konpagni va rotrouv son santé ? Bin oui, pars i paré sé lo bi. Mé pou in n’afèr konmsa, moin la bien pèr na poin mirak : va siprim in pé bann lign, va vann in pé l’aviyon, va diminyé lo bann travayèr. An parmi lo mil z’anploiyé, konbien va résté ? Na arienk bann vaza la diréksyon i pé konèt. Sa sé in ségré rantre zot é mésyé Didier, mé lo ségré lé riskab èt, san tardé, in ségré Polichinelle, pars konm in pé i di, i fo fé vit, lo tan lé konté... “Zournal l’il La Rényon” i anons pa na in konpagni ba-pri i sava rouv in lign dsi La Rényon. L’èr-la, mi oi pa koman Er-Ostral i sava pran son tan. Arzout ankor èk sa, i koné pa si l’Erop va lès SEMATRA fé son pli tousèl, é si i obliz pa la konpagni arvann in bon kantité z’aksyon.

Boudikont, pandan lo tan nou l’apré fé tout kalité trikmardaz, nana demoun pa tro loin, l’arzan i mank pa zot, é l’anvi kapar in gayar konpagni i mank pa zot. Kisa ? Na lo Quatar, na l’Arabie saoudite épi d’ot ankor. Banna nana sirman in zyé dsi nou. L’arzan i mank pa zot, épi zot na zot ségré pou fé zot profi. In konpagni konm la not, sa pou zot, sé in sinp boushé d’ri. Donkn akoz pa mèt la min dsi ? Donkalor, aprésa i vann tout ?

NB : Nout l’indistri sikriyèr lé pi anou. Nout l’izine sharbon-bagas lé pi anou… domin pétèt Er-Ostral, é apré, kosa ankor ?

Justin


Kanalreunion.com