Oté

Estrosi-Didier Robert An sharèt shaviré !

Justin / 2 novanm 2012

Mésyé Estrosi la vni La Rényon pou fé kanpagn pou mésyé Fillon : ala sirman in n’afèr i sava bien èd anou désot la kriz. Li la pas la pomad dann do Didier Robert. Didier Robert la pas la pomad dan son do, donk zot i èm konm patat an krèm. Tousa lé bien bon. Mé soman, Estrosi, sa i di anou in n’afèr sa ! Zot i souvien kan li la vni La Rényon pou fé kanpagn pou Didier Robert. Zot i rapèl kosa li la di dsi lo tram-trin. Pou li, gouvèrnman l’avé poin l’intansyon done la rant férovyèr pou nout tram-trin, in n’afèr bann Réjyon i gingn dan la Frans pou pran la sharj zot trin réjyonal. Arzout èk sa, li té i di for an batan dsi l’éstoma, vi k’li lété minis, lo gouvèrnman va suiv ali.

La suit, ni koné, Didier Robert la antèr nout trin, konm li la antèr in bonpé projé Paul Vergès l’avé komans mèt dsi raye. Solman la-ba, dan son réjyon Nice-Côte d’Azur, lo Estrosi la aksélèr a-fon lo tram. Pou la-ba, li la konprann koman in n’afèr konm sa lé intérésan : inn pou diminyé l’anboutéyaz, dé pou diminyé la polisyon, troi pou dévlop in transpor an sit prop pou toulmoun. Konm si sak lé mové pou La Rényon lé bon pou son réjyon, konm si sak lé bonpou son réjyon lé mové pou La Rényon.

Konm nou la fine di pli d’in foi, partou dan la Frans, ousa la mèt in tram, la ranbours lo krédi in manyèr inkroiyab : sa lé vré pou Montpellier, sa lé vré pou Bordeaux, sa lé vré pou Nice épi pou in ta èk in paké gran vil, é zordi, pou bann vil moiyène pars na in nouvo zénérasyon tramway i komans dévlopé. Mi pans sa n’arté vré pou La Rényon osi. Donk, alalila lo gran déstriktèr La Rényon é lo gran batisèr dan la Frans kosté kosté sanm Didier Robert, lo boug l’apré amèn nout péi an sharèt shaviré.

 Justin 


Kanalreunion.com