Oté

Ete pasyan, ète rézonab ? Nou dmoun dézyèm mond, nout kondisyon i pèrmète pa nou !

Témoignages.re / 21 févrié 2013

Mésyé l’minis Lurel, ou di anou konm sa, i fo nou lé rézonab, i fo nou lé pasyan. Pétète ou i koné pa an vré dan kèl sitiasyon ni lé ? E bin, baz solman, si ou i vé, dsi bann shif moin lé sir ou i koné déza : sinkant pour san dmoun dsou pa d’port la povrété, san-soisant mil shomèr, soisant pour san bann jenn marké dann Pol anploi, disète pour san dmoun dan la mizèr noir... Vi koné mésyé l’minis, sak lé bète avèk bann shif-la, sé ké zot i amontr dan kèl ka la majorité d’moun i lé, mé zot i amontr galman dis pour san d’moun i gingn, par pèrsone, dé-mil-sink san éro par moi. Sa sé dmoun ni koné, sa sé dmoun i pass dovan nou toultan dan zot gro loto, nana zot gayar vila. Sé dir si ni oné a zot, é si zot i koné anou.

Nana lontan, i di La Rényon i diviz an dé : sak i priv pa zot pou arien é sak i an pé pi afors privé. Na lontan désèrtin i di sa, mé nana lontan bann gouvèrnman, ki soi la droit, kisoi la gosh, i fé konm si zot lété pa la èk sa. Mi koné ou i pans ou lé pa minis dopi in an é demoun i domann aou fé mirak. Mi kroi, ou i pans demoun lé tro inzis avèk ou mèm ; avèk mésyé Ayrault, avèk lo prézidan. Poz aou solman lo késtyon : pou kosa demoun la vote an gran majorité konm sa pou François Hollande ? Mi pé dir aou, pars demoun té i pans in mirak i sava arivé. Demoun té i kont dsi in mirak... Moin lé sir ou l’apré di dann out tèt, mirak la poin dan lékonomi, dan l’anploi, dann lojman. Biensir, ou na rézon pou out mond aou. Biensir, ou na rézon pou lo promyé mond, mé pa pou l’ot, pa pou nou...

Mésyé lo minis, dopi ou lé dann gouvèrnman, sanm pou moin ou l’avé l’tan pou fé dé shoz inportan, mé ou la pass par koté. Ou i souvien kan la konsil l’Outre-mèr dsi sak na pou fé dan lékonomi, ou i an souvien konm sa lété baklé ? Ou i an souvien dsi kosa la déboushé ? Mèm pa lo kar d’la moityé di dizyèm sak lé nésésèr pou lo péi. Ou i souvien kan bann mèr la domann aou kontra pou la rantré ? Ou la kaziman anvoy azot baladé... astèr ou di i fo ète rézonab, i fo ète pasyan. Na arienk sak na tout, sak i mank de riyin i pé èt rézonab, ète pasyan. Lé zot, lo dézyèm mond, konm mi di aou : zot kondisyon i pèrmète pa zot sa.

 Justin 


Kanalreunion.com