Oté

« Fanm-la i manz zaran èk bonbon koko ! »

In kozman pou la rout

Justin / 26 novanm 2016

Ala in kozman mi konpran pa bien lo sakivédir. Fransh vérité lé dé i marsh pa ansanm : zaran lé salé vèy pa koman, dé foi mèm li lé in pé amèr. Bonbon koko, sa lé bien dou ! I di pa pou fé bobon koko i mète mèm kantité koko rapé ké dosik ?… Mé moin néna in souvnir dann tan moin té i pass vakans Sin-Lé. Dann tan-la l’avé in madam, i di, té i sava rod in sipléman avèk bann mari la pa li. Donk in vyé péshèr tramaye demoun té i kriy ali Léon Boudiny Ernest téi oi souvan lo tourné-viré lo madam apré signal in mari la pa li é in soir demoun la domann ali – dovan moin, dann tan-la ti zène zan !-kosa fanm-la téi fé tar konmsa dsi la plaz ? Li la réponn sak moin la marké an-o la. Bin lo zaran té kosa ? Mi pans té lo dovoir konzigal. Lo bonbon koko alor ? Daoir sa té lo pti plézir, lo sipléman konm moin la di an-o la. Pétète lé vré ? Pétète lé pa vré ? Pou Danyèl Honoré dann son liv « somi lo mpo » lé ipé konm sak moin la di.sé in fanm k’i pran tout bononm l’ariv. Touléka mi lès azot réfléshi la dsi, é ni artrouv pli d’van sipétadyé.


Kanalreunion.com