Oté

« Fanm la, la kass la kord » – in kozman pou la rout

Justin / 22 avril 2015

Pou sak, konm moin, i komans a daté. Pou sak la koni lo tan sharète bèf, nou n’avé souvan la krintiv, lo bèf i kass la kord épi i sar ranpli son l’étoma kat pyès [1] dann karo poi out voizin, sansa dann karo jenn kann ou sansa ankor dann jardin in moun. Arzout èk sa lo traka ou nana pou alé trap bèf la !

Mi rakont pa ou… Donk té pa in bon n’afèr ditou… Tout façon, kass la kord sé pran son libèrté. Si la pi lo ka pou bèf, lo léksprésyon i viv ankor pou dmoun. In madam i sov son mari é dmoun va di, èl la kass la kord, pars dann son ménaz èl té konm anmaré avèk in kord. Dé foi lé préférab pran son libèrté si ou i an apèrsoi ké lo maryaz lé tro dir pou ou. Sa lé vré pou in fanm, mé sa lé vré pou bononm osi.

Kosa zot i anpans zot ? Arien ditou ? Moin lé sir zot i pans in n’afèr si zot i fé travay z’ot koko, é si zot i fé bouy z’ot matyèr griz. Donk, kalkil in pé é zot va oir si, rant-rant, ni tonm pa kékfoi dakor rantre nou.

[1l’éstoma kat pyès : la pans, lo féyé (kréol i di sa port-fèy), lo boné épi la kayète.


Kanalreunion.com