Oté

Fatigé avèk travay an sold !

Justin / 10 zanvié 2011

La vote la loi départman fransé dépi 1946. Dann bann z’ané 1980 la fé la réjyonalizasyon. Apré nou la konète l’égalité sosyal. Dann tan Bumidom la vide La Rényon in bon parti son zénès pou konm té i di, dann tan-la, diminyé la présyon d’moun déssi in bout la tèr tro pti. Gouvèrnman droite konm gosh la fé bann loi program pou, soi-dizan, mète nout péi dann shomin lo dévlopman ékonomik.

Zordi la sityasion lé konm sak ni oi dovan nou. Plis 140.000 shomèr, plis la moityé d’moun pov, in mank lojman, l’ilétrism épi tout bann problèm ni koné galman. Si l’avé in sityasion konmsa dann in départman fransé la métropol, moin lé pliské sir nora fé in plan, séryé, pa in fo-train konm ziska zordi.

Konm plan ratrapaz na poin arien sinon avèk la krash. Lo diskour sis novanm 2009 prézidan Sarkozy, gouvèrnman la palank dann fon... Mé i diré, d’apré sak mi antan, sa i kontant méssyé préfé, fyèr avèk lo rol l’Etat, pars li la sov son vinn-sink mil pti kontra édés. La, li la fé in n’afèr, zanr vide la mèr avèk in tinbal... épi, i fo kant mèm ni rapèl kréol i domann vré l’anploi é lé fatigué avèk travay an sold.

 Justin 


Kanalreunion.com