Oté

Fé a ou peti pars la modesti sé in kalité !

Justin / 5 zwiyé 2014

Mi sort lir in liv –Condorcet (par Elisabeth et Robert Badinter)- né an 1743 mor an 1794, an Frans.
La lékol la fé aprann a ou Voltaire, Rousseau, Montesquieu ou Diderot, mé pa tro Condorcet.
Condorcet té in matématisiin ; in moman li la voulu aplik bann téori siantifik si démars politik ; i di an soutit- in intéléktièl an politik.

Nanpès, minm si lé pa nout épok, oui di si li lavé viv nout épok, noré été kan minm in gran an politik.
Par égzanp, kan mi analiz sak té ispas (royoté, noblès, pov travayèr la tèr é pi bann la rolizion), oui trouv zinégalité sosial, ékonomik…
I falé in révolision ; i falé in kouraz kan minm ; minm Voltaire la du égzil a lu an Suisse po li giny ékrir tout sak li voulé, po fé avans son bann zidé, po défann zinzustis ; si lu té rés an Frans, lu noré été anprizoné !!

Sé la ke mi fé in paralèl ék nout épok é nout résponsab.
Sé sak Paul Vergès la fé an antran dan la klandestinité po fé konprann dabor son kouraz é son déterminasion, ke lo sistèm lopresion la loi i vé étouf a ou é i vé pa ou eksprime in nafèr i plé pa zot ! minm si zot na tor !
La, mi pans : Paul Vergès –son papa ?- Laurence ? é tout Réynoné é Réyonèz té i antour a lu-zot lavé lu la vi bann zintéléktièl konm Condorcet ?

E moin mi lir an fransé- pars sé in lang moin la aprann ; ma konèt plis sak zintéléktièl fransé la fé !
Alors na otan zintéléktièl sinoi, indiin, zarab, anglé, russ ou amérikin !?
« Tout ce que je sais, c’est que je ne sais rien » sa sé in filozof grèk(Socrate) i dizé sa ; donk, moin, mi di :
« Fé a ou peti pars la modesti sé in kalité ! »

Justin


Kanalreunion.com