« Fé lèv lo mor ! »-In kozman pou la rout

I prétan dir kan ou lé mor ou lé bien mor.alors kosa i lé so zistoir d’fé lèv lo mor-la ? Sa i vé dir, i f opa anparl z’afèr lé fine pasé dopi lontan. Zot i koné na d’moun lé rankinyé sansa rankinyèz : mèm in n’afèr l’ariv nana san sète an, zot i obli pa.zot lé mèm paré pou souf aou sa dann trou d’zorèy. Moin na in vyé kamarad i di souvan : i obli pa lo pasé, mé lé posib fé san li. Sa sé in bon lézon dann la vi... Mèm dann zéléksyon k’i ariv, si ou i mète dakor dsi li fon. Pars boudikont sé arienk lo fon k’i kont !

Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète tazantan dakor rantre nou.