Oté

Fé marsh l’izine : Nou lé pa kapab don nou ?

Justin / 6 zanvié 2011

Kan la fé l’izine éléktrik Boi-Rouj épi le Gol, toulmoun la pans sa in bon z’afèr pou nou, pars i tiliz la bagass épi sharbonn-tèr. Sèl rogré in pé l’avé, nou an parmi, lété par raport lo pèrsonèl té i fé lo konstruksyon. Nou té i vé té i form lo bann travayèr rényoné pou alé partou pou fé bann l’izine konmsa, ousa na la domann.

Solman, ni aprann zordi, la polisyon lé for. Par-la, karant pour san lo gaz i fé l’éfé-dsèr. A pépré konm toute loto épi kamiyon i roul déssi la route. Sa lé pa bon pou nou ! Sa la pa in bon légzanp non-pli pou lé zot l’androi. L’Alyans l’avé déside goumant loktroi d’mèr déssi lo sharbon pou diminyé la polisyon. I prétan dir, bann lizinyé la déside momandoné ranplas sharbon par la biomass. Mi koné pa si zot la déside fé sa pou vréman, sansa solman avèk la boush.

So kou issi, ala k’ni aprann sé in sosyété bann z’Amérikin i finans déssi bann fonn-pansyon ké lé propriyétèr lé dé l’izine. É kan i di aou z’Amérikin épi fonn pansyon, sa i vé dir zot la bézoin dividann pou gonf zot pla ; Tanka bann travayèr la-dan, bann patron i sousyé pa bokou dzot. Zot lé konm k’i diré kantité néglizab. Mé ala k’lo kantité néglizab i vé kont pou kékshoz ! In pé plis lo patron té i anval son léstilo. Poitan, mi oi pa kossa i pé anpèsh anou okip fé fonksyone dé l’izine-la, é an-plis fé lénèrzi prop. Nou lé pa kapab don nou ?

 Justin 


Kanalreunion.com