Oté

Fé vnir dosik La Frans éstèr !

Justin / 10 désanm 2014

Mi pans, ni vé, ni vé pa, firamézir ni vien plizanpli fransé. Mèm nout sik apré tourn son fransé ! Pou kosa mi di sa ? Pars na poin tro lontan, mi sava dann in gran komèrs, pou alé rode dosik konplé. Sanm pou moin, moin té i sar trouv mon salu la-dan. Mi pans mon kor lé fatigé manj lo sakaroz, alor mi di mi sava rode dosik konplé, konmsa moin va fé plézir ma boush, épi m’a kontant mon kor avèk lo kalsiome, lo potasiome, lo bann vitamine b. Konm di la shanson, avèk sa mi sava lish mon lang, épi mon kor va tonm dos.

Dann ln gran komèrs mi trouv in pé tout sik : dosik-dosik, dosik san sik, do sik shimik dosik an plant. Dosik konplé ? O ki, mimite. Mi trouv I sashé 750gram in n’afèr I apèl kasonad (cassonade). Mi kass mon porte-moné épi mi ashète ali. Sirpriz-sirpriz kan mi ariv mon kaz, mi lir dsi lo sasé an plastic lo cassonade I sort La Frans, dann in kartyé I apèl Chateaubriand : dsik kann do Frans, par l’fète. Mi rogard lo konpozisyon : na poin. Mi rogard koman la fabriké : la poin non pli.

Mi sava oir lo bon doktèr internet k’i ésplik amoin la cassonade, sa in sik konplé kan lé fé dan La Belgique. Otroman an Frans i fo apèl sa vergeoise. Si ou i vé la cassonade i fo ou i ashète vergeoise. Tan k’a lo cassonade de Frans-i paré !- sa in sik mélanjé avèk karamel pou la koulèr é nana 98 % lo saccharose dodan. Lo potassium, parti ! Lo calcium, baré ! lo vitamine la fine mète lé voil. Désépsyon, désépsion sirtou ké i fo fé vnir dosik dopi La frans koméla.

In kozman pou la rout : « Roul le moun dan la farine, sa in métyé sa ! »


Dabor akoz « roul dan la farine » pars pou fé bien frite in poison, zot i koné i roul ali dann la farine, donk si i roul a ou dan la farine, ou i oi sé pou fé koi avèk ou ! Sa in métyé ? Oui pars si ou lé pa d’métyé ou fé trap aou promyé kou . Si ou lé d’métyé ou i pé fé kroir blan pou noir, makaroni pou la bouji, savon pou fromaj. Fé travay zot koko, fé bouy zot matyèr griz zot va oir koman in pé i roul anou. Mèm Sarda la roul anou !


Kanalreunion.com