Oté

Fèt dé mor, rolizyon sinon sa kiltir ?

Justin / 29 octob 2013

Dépi tanmti, papa èk momon, tou lé zan, an fami, lo zour promyé novanm, i binye, i mèt in linz korèk, si na in soulyé i mèt, — a nou nou té sava pyé ni, pars apré la gèr (pétèt avan osi, mé moin la pa koni), nou té si tèlman pov, nou té bèz a pat, dann santyé kane, la ravine, somin sarèt, nou ariv la vil, é là, nou travèrs simtyèr.
Nou sa war la tonm défin Klod, défint Odèt, Elie èk Rufine lé mor apré siklone 48, mon bann promyé souvnir : i di a nou, sa zot bann frèr ; 4 mor an 10 zan ; plid’mor ke de vivan, piské nou té 3 zanfan vivan !
Mi rapèl tout lo kantité flèr…
In kou, moin la doub in klas. Po moin ratrap a moin, mi plant mon flèr dépi sèktanm, mi aroz a li, mi sar trap lo dann basin la ravine. La fèt dé mor, moin osi moin na mon bouké margrit.
Dann simtyèr, domoun i sort partou La Rényon, i vyin war zot mor. I aranz lo karé, i aras mové zèrb, la kroi blan fini pouri, i wa pi lo non, papa i di : « sa la kroi défin Klod, mor en 46, li navé 4 an, té in rouzon konm ou, té i mèt a li déza si lo do bèf kan i sort bitasyon, dann gro solèy ».
Sak na lé moyin i sava vizit partou lo bann paran, gran-paran, avèk tout maryaz, in fami Sin-Bénwa i pé awar in mor Sin-Pièr.
Inn Tanpon, li pé an awar Lantrédé, Sin-Dni. Inn Plèn dé Kaf, i pé awar inn antéré Gran-Basin, Salazi i pé awar bézoin désann Sint-André.
In zour moin té Rodrig, moin la parti simtyèr Pormaturin, koté bann Rodrigé, po moin koz èk mon monmon lé mor dépi 1966. Tout fason, sa i spas dan la tèt !
Fèt dé mor, dan nout péi, in rolizyon ou in kiltir ?

 Justin 


Kanalreunion.com