Oté

Filizof èk personaj, réfléksyon, aksyon

Témoignages.re / 16 novembre 2013

Na in pé si la késtyon : « Sé koué in filozof ? » i réponn a ou, sé in révèr, oui mé in révèr i rès dan son nyaz, alor kin filozof, sé in moun i réflési, i bouz é i fé bouzé.
Na d’moun la risk zot vi po zot zidé, dot la ronyé po pa alé an prizon po krévé ! In personaj, sé ot shoz, sé plito in boug lé dan lo parèt, li prézant bien, li na in gayar kostime, mé dan son vant ou dan son tèt, ti trouvra pa gran shoz.
Isi, La Rényon, lé pli gro personaj, sé nout bann préfé. An Polinézi ou Nouvèl Kalédoni, i apèl sa O komisèr. Zot lé la po in rol prézantasyon, zot prozé d’vi i domann pa zot, zot i roprézant l’Éta, ouala zot personaj !
In filizof i mèt son vi, son angazman an akor èk son réfléksyon, son filozofi. Ou na in bon pé dan listwar limanité, listwar la Frans, listwar nout péi.
Atansyon, pa bézoin fé tro dézord po èt filozof, égzanp : ou viv an kréol, an akor èk out pèp, landroi ou lé, lang, manzé, kiltir, pa bézoin kri si tou lé toi, ou mintyin in mod de vi lé indispansab po toué, po ton bann konpatryot, ti viv an larmoni èk tout domoun o zalantour, cé in filozofi.
Dot i angaz dann konba la mizik tradisyonèl, in pé dan la politik, lot dan lansègnman.
Lo tout, sé pa d’fèr in shoz èk son kontrèr, mi koné i lit po la plas la fame, na ankor i aksanti zot kapasité si légalité dé ras.
A moin, ant èt in filozof ou in pèrsonaj, mi soizi èt in filozof. Dan mon manyèr, mi ésay akord mon réfléksyon èk mon bann zaksyon, individyèl é koléktif, pa touzour fasil, mé pa kapab lé mor san éséyé !

 Justin 


Kanalreunion.com