Oté

Final de kont, aprésa, i fé rien si bann ésportif i piss blé, mov sinonsa an tout koulèr !

Justin / 11 out 2016

Mi koné pa si zot i suiv tout bann z’aktyalité ésportiv, mé si zot i suiv sa, mi koné pa si i rès azot in pé d’tan pou z’ot okipasyon abityèl pars i fo dir pou vréman dopi moi d’zyin la pal’éspor ki mank dsi bann bouké satélit. Arzout èk sa lo bann manifèstasyon i fé a tout z’èr, é lo pli souvan kan la pi l’èr s ditou…

Moi d’zyin é komansman zilyète la fé la koup érop fotball : in kargézon match konm lé difisil an avoir pou vréman. Aprésa la fé tour d’Frans an vélo avèk lo roportaz avan la kours, pandan la kours, apré la kours, é sa la dir troi somenn. Dopi komansmann lo moi d’aout so kou isi nana zé z’olinpik. L’èr-la mi pé dir azot, sak lé gazé pou l’éspor, li gingn pou kontant ali. Arzout èk sa, i paré Lo Brézil lé an rotar d’uit èr par rapor La Rényon. Sé dir si out kadans la vi la pa shanboulé !

Mé zot va dir amoin : sak i èm pa l’éspor, kosa li pé an avoir konm program ? Près pa ! Sof bann fèyton, tout kalité fèyton, é sa i komans l’èr d’manzé épi i kontinyé ziska katrèr par-la, mé sa i pé kontinyé ziska lo soir pou sak néna in bon bouké pou zot argardé. L’èr-la, l’afèr lé intérésan, pars si mi di azot bann fèyton-la la pa tro katolik, mi pans moin lé ziska loinn la vérité.

Aprésa si zot i rouv in sèrtin radyo trottoir, zot noré pu, avan-yèr si zot i voulé diskite dési l’in portans an avoir bann diak o féminin. Si z’ot zorèy la pankor tro siflé, mi pans zot lé bien armé pou antann tout sort kalité kozman. Mé yèr zot noré pu galman diskite dsi lo dopaj dann l’éspor.. Mon dyé ségnèr ala ké mi artonm dsi l’éspor.

Mé rantre tan, la loi travaye la fine pass dann zournal ofisyèl é sak i koné pa, inkyète pa, l’ané k’i vien li va komans konprann sète afèr-la … Aprésa, final de kont tanpi si bann ésportif dopé i piss blé, mov, sansa koulèr l’ark an syèl.


Kanalreunion.com