Oté

Finalman, madam Penchard, sé la voi d’son mètr !

Justin / 26 novanm 2010

Marie-Luce Penchard la vni bate in pé karé La Rényon. In pé i domann pou kosa. D’ote sré kiryé d’savoir kosa èl la fé pou (ou byin kont ?) La Rényon dépi k’èl lé ministrèss l’outre-mèr. Mon dalon i apèl Zanbash i pans pou vréman i fo pa poz késtyon initil déssi sak demoun initil i fé. Moin pèrsonèl, moin na tro réspé pou l’moun pou di lé shoz konmsa. Mé sa i anpèsh pa moin kalkilé.

Akoz madam Penchard i vyin oir anou ?
I paré èl na la famiy issi, donk sé lokazyon oir ali in pé. Mèm kan ou lé ministrèss, ou i pé rann vizit out famiy. Sé mèm la prèv ké ou lé famiy-famiy, donk in bon santiman dan èl. Épi, i prétan dir, èl la pran in an pou détak la klé diskour méssyé Sarkozy. Pars lo sis novanm, kan lo ga la fé son sobat-koz, na aryink in afèr la aral aèl pou vréman, sé kan Sarko la di té i nonm aèl minis. Son kèr la bate dan son do, son doi d’pyé la dig-digué. In pé plis, èl té i artrouv aèl dann péi nirvana.

In an pou mal lir in diskour ?
Mi di in an, pars dépi èl i vyin shé nou, moin na konm dan l’idé èl la pa lir diskour son prézidan. Si èl la lir, mi pans sé in pé dovan-déyèr. Pou kosa mi di sa ? Pars kan la anparl tram-train épi la rout litoral, èl la trouv lé domaz larzan-la té i sava pa dan La Guadloup. Kan Konsèy zénéral la di l’Etat i doi ali larzan par santène milyon, la minis la di, èl i pèy pa, pars èl noré pa fé lo mèm shoi késtyonn bidzé. Kan Sarko la di i fo nonm in pé d’moun kapab i sort l’outre-mèr dann bann péi l’outre-mèr, èl la konpri té i fo anvoy bann z’amontrèr La Rényon la-ba dann Créteil pou fé zot éstaz.

Mé, final de kont, ministrèss-la i fé konm lo shèf, i di in n’afèr épi i fé lo kontrèr. I promète in n’afèr é i tyinbo pa kont. Finalman, konm di lo kont, sé la voi d’son mètr ! Mi santi sa i sava fé plézir aèl.

Justin


Kanalreunion.com