Oté

Fini lo tan koshon vol ! Fini lo tan, marmite vol !

Justin / 29 désanm 2014

Lo tan zéléksyon l’ariv ankor. I paré i sar vote dé foi dan l’ané, pétète plis pars i ariv i robis in kou. Astèr mon késtyon sé pou kisa i voté ? Pou in moun ou sinonsa in list i vo la pène ! Dakor, mé ki k’i vo la pène ?

Moin pèrsonèl moin la touzour vote pou sak monparti la di vote. Pou koué ? Pa par s mon léspri lé parès, pa pars moin na poin léspri kritik mé pars mon parti mla touzour baz ali dsi bann prinsip é sa sé in n’afèr k’i fo.

Mi sar pa dir azot tout bann prinsip, mi sar di inn-dé épi zot va oir sa in bann prinsip lé valab… Dabor mon parti lé rényoné é sa sé lo minimome pou moin. Dézyèm z’afèr li la touzour amène la politik l’inyon : l’inyon rant demoun parèy ? Non ! Rant de moun pa touzour parèy é sa sé lo méyèr fasion fé l’inyon. Troizyèmman li la touzour konbate la mizèr é sa sé in n’afèr ni doi doktèr Vergès é sa i fo pa obliyé. Na d’ot prinsip ankor konùm lo réspé la parol doné, konm la solidarité rant demoun oprimé, konm in konba sana ré kont lo sou-dévlopman.

L’èr-la, mi pa dir azot si mi vote pou un kandida, sar sirman pou inn na mèm prinsip ké mon parti é mi sa pa tir tiboi-gran boi pou shoizi mon kandida, mi sava pa non pli grate ti-boi, ni vote par azar. Lo tan koshon vol la fini ! Lo tan marmite vol osi !

In kozman pou la rout : « avèk in koshon i fé pa in shoval de kours ! ». 


Sa sé lo kozman danzéré. Pou koué ? Par si demoun i pans sa par rapor aou, sa i vé dir ou i pans ou naplis kapasité ké pou vréman. Ou i pans ou lé pli intélizans ké dann la réalité. Ké ou lé pli for, ké ou lé pli kapab. Sa lé vré pou dmoun ! Sa lé vré pou bann parti ! Sa lé vré pou bann dirizan bann péi. Fé travay zot koko, fé bouy zot matyèr griz, zot va oir si zot i tonm pa in pé dakor avèk moin.


Kanalreunion.com