Oté

Fou si lo kont « konzé anièl »

Témoignages.re / 28 désanm 2013

Do moun i di a ou, oui kroi pa ; oui antan si radio oui di la pré invanté ; ou la fine lire « courié léktèr » ; brèf, dann sak i apèl la di la fé ; na a prann é a lésé ; mé bayoun sak la ariv a moin ièr, zot lé pa payié po kroir…

In vil la Rényon, dizon in kartié dan lé o : ek mon zanfan, mi sar aminn mon dé kabri pran vakans ; lo matin mi dsann in somin blaké ; mi wa do lo i koul a tèr ; mon gro bouk i ral a moin, mi tiin, mi frinn, moin lapèr glisé, tonm a la ranvers.
Laprèmidi mi armont la kaz ; dan lo minm somin, lo la i koul ankor ; mi désid apèl la CISE ek mon portab, po prévnir a li dolo la po pérd dopi lo matin ! Si i fé toultan in mank lo si la komine, i fo nir koupé ; sé zis in rogar ek in gro klé karé, donn in tour d vis, sér a li in bon kou é répar ou ranplas lo tuyio pété, fini ek sa !

Nou la fé in koléktif lané pasé po règ la kestyon d lo ; nou la fé rényon si rényon ; lo diréktèr la pa arèt di a nou li fé sak li giny ; tout lé an plas…
Ekout koué oui antan si téléfone (an fransé):ou lé biin si la SIZ , sid–ouèst, tanpon troi-basin ; si ti vé tanpon fé lo1 : kominiké 19 désanm (nou lé fine ariv 26), bann popilasyon kab mank lo si tèl tèl séktèr ; si ti vé lintervenan téknik fé lo 3 ; nou apèl ton intervenan : dring ; lo tan po giny linternenan lé tro long ; veuillé raplé iltèrièrman…
Si ti fé in ot niméro ti tonm si troi-basin ; i ardi a toué kèl kartié laba la poin d lo …

Pandan s tan, lo somin ton kartié lo i koul dan, dopi lo matin, i atann touzour ! Konbinn d moun na poin d lo ? Dépi kan ? Ziskakan ?
Dizon tout la bann lé an konzé anièl !

 Justin 


Kanalreunion.com