Oté

Fransoi promyé ? Pétèt in bon nouvèl !

Justin / 18 mars 2013

Bann katolik na in nouvo pap dopi dé troi zour. Sa sé in n’afèr lé inportan, a komansé pou in milyar dé san milyonn pèrsone i pratik rolijyon-la, mé pa solman pou zot pars, mi pans, nana ankor plizyèr milyar d’moun kisoi napoin rolijyon, kisoi na in n’ot rolijyon va suiv l’aktyalité é zot va pran an kont sak lo nouvo pap va di. Zordi li di i fo lit kont la mizèr. Li sort mèm di, i fo in légliz pov pou bann pov... nana shanjman pou arivé suivan la manyèr légliz va aplik so prinsip-la. 

Tout fason, la lit kont la mizèr sa in n’afèr k’i fo pa néglizé, vi k’nana in gran kantité d’moun i viv dann la mizèr, kisoi dann péi pov, kisoi dann péi rish. Près in milyar d’moun i soufèr la fin, na mèm poin do koi ranpli zot vant. Astèr i fo atann sak li va di pou konbate la mizèr... Si sé par la sharité, suivan lo sans domoun i done so mo-la. Mi pans, sar pa tro éfikas, si i shanj pa lo sistèm ékonomik, si i aboli pa lésploitasion l’om par l’om, donk si, konm i di, lo mond i shanj pa d’baz.

Mi antann in pé lé kontan pars lo pap i sort l’Amérik di sid. Dizon sa sé in n’afèr lozik pars sé dann lo sid nana plizanplis katolik. Mé l’Arzantine ? Zot i koné sa in péi la soufèr la diktatir militèr pandan sètan : in diktatir militèr avèk son kortèz la réprésyon, la tortir, l’asasina, l’anlèvman bann zanfan... Lé vré, an déor i parl pi si tèlman sèt afèr-la, mé dann lo péi i anparl in bonpé. I anparl pou l’égliz l’Arjantine pars lo rol l’Égliz, suivan sak i di épi sak i ékri té pa tro klèr... In pé i fé roprosh lo pap li mèm, dann an li lété lo provinsyal bann zézuit son péi.

Vré, pa vré ? Lo vatikan la démanti. Vré, pa vré ? In zour, mi pans va konète... Astèr, pou zordi é pou domin demoun va ziz lo nouvo pap suivan lo rol li va pran pou konbate la mizèr. In pé i di pars li la pran lo nom Fransoi Promyé é konm Fransoi d’Asiz la pass inn vi pou konbat la mizèr, sé pétèt in bon nouvèl !

Justin


Kanalreunion.com