Oté

Frèr-sèr, kouzin-kouzine, voisin-voizine ! Révèy azot in pé ! Révèy azot Bondyé !

Justin / 26 zwiyé 2016

Mi sort lir zournal témoignages lindi 25 zilyé 2016 é fransh vérité moin lé bien an kolèr. Pou kosa ? Pars in foi an plis mi apèrsoi nout péi La Rényon la pèrd son droi dann l’oséan indien. Sé konm k’i diré sak i rès dann l’éspas kan in trou noir la anvalé : in zétoil dispari.

Pou kosa mi di sa ? Pars, si zot la lir zournal, zot va rann azot kont ké nana dé rankont rant bann gouvèrnman bannzil l’oséan indien é ké La Rényon li lé pa la, li la poin kansréti lo pli pti éstrapontin pou li poz son fès dosi. Banna i diskite rantre zot, é nou ni rès déyèr lo mir z’ot rankont rantre zot.

Kont ki moin lé an kolèr ? Dabor kont gouvèrnman La Frans pars li la kass lo pti pé d’droi ké nou l’avé dann tan Sarkozy, é ké ni révé d’an avoir kan in prézidan dé droit té i anparl lo dévlopman andojène. Nou la fé in pti pa an avan é, malorèzman, in pa d’zéan an aryèr. Na in zoizo i apèl lo koukou : l ponn son zèf dann ni lé z’ot é li zète lo zèf lé z’ot a tèr. Konmsa mèm gouvèrnman de gôsh i fé avèk nou !

Kont kisa ankor moin lé an kolèr ? Kont lo bann gouvèrnman bannzil nou lété solidèr ansanm dopi in bonpé d’z’ané. Zot na poin in mo, in zès pou nou. Na poin inn pou domandé ousa La Rényon i lé ? Pou kosa la pa la ? Pou kosa mèm son nom banna i éfas dann z’ot rézolisyon final. Zot sé ankor nout frèr-sèr zot ? Zot sé ankor nout kouzin-kouzine zot ? Nout voizin-voizine zot ?

Frèr - sèr, kouzin-kouzine, voizin-voizine révèy azot in pé ! Révèy azot Bondyé !


Kanalreunion.com