Oté

Frodèr maryaz, avèk aspèrkui Sak i prépar manzé, é sak i amène la boush !

Justin / 6 out 2010

A ! Si l’avé poin bann bra-for la-ba dann Brézi... A ! Si bann kabalèr l’avé pa mète-mète ansanm. A ! Si lo mèr Gonthier l’avé pa été la... pou bate-bate maloya, pou amontr son shapo la paye pou di, nou lé la ! Bann l’UNESCO lété riskab obli nonm lo nom La Rényon, oubli trap nout dossyé l’avé mète andsou d’lo dossou la pil l’avé la-ba pou rogardé. Rozman, nout bann fyèr-a-bra la tyinbo séktèr. Baya ! Nou la pass pré !
Mon kamarad Zanbash, k’i èm trouv nyaz dann syèl blé, i di amoin i fo pa kroir sak ou i oi... i fo pa kroir lo bann pintade té la-ba la fé in n’afèr. Lo vré travay l’avé fine byin avansé dépi in bon koup de tan. A bon ? Byin sir, ni koné in komité l’avé travay pou fé in bon prézantasyon nout dossyé. Méssyé René Robert, in gran savan la vni dann télé pou éspliké. Mé La Réjyon, dann tan Paul Vergès, l’avé prézante lo SAR é dann SAR-la l’avé prévi in park natirel... é konm toulmoun i koné, "Pitons-cirques-ranpart" sé lo zanfan lo park. Sa lé aprouvé sa ! Sa la pa in kou d’pintir ! Arzoute èk sa, nana dé zan karann-sète péi la réinir issi, pou diskite déssi shanjman klimatik. Armète ankor toute sak l’UICN* la fé pou prézante nout péi dovan l’UNESCO. Byin antandi, mi pé pa di toute, la plass na poin.
Èstèr, in pé i sava fé la fète, kan zot la pa fé aryin. La-ba dann l’il Maurice, nana frodèr maryaz. Issi nana bann aspèr kui an kantité. Nana sak i kui manzé é nana sak i amène solman la boush. Dézyinm katégori, sa i mank pa sa !

* UICN : Union internationale pour la conservation de la nature.

Justin


Kanalreunion.com