Oté

Gaspiyaz la vyann Lé byin rogrétan la pa bonbarde sa kout tomate pouri

Justin / 24 séptanm 2010

Koméla, i donn gro zanimo séréal pou manzé. Zot i grossi byin. Sirtou ké dann manzé i mète in pé toute z’afèr konm la poud la vyann, la poud poisson, vitamine, mèm in pé i mète médikaman. Kèl maléré sor !

Dis kilo do ri, mayi, sansa lo blé pou in kilo la vyann
La pa inkyète bann gouvèrnman si l’élvaz i kontribyé éshof lo klima, non pli si près in milyar d’moun dsi la tèr na poin do koi ranpli zot bouzaron. Konm di lo kont, la pa lo traka d’Sisya viv déssi in planète malade, manj la vyann, soir é matin, an goulipya san agarde lo frèr apré krèv la faim.

Akoz i sote pa in zour ?

Rajendra Pachauri, prézidan lo GIEC, la domann bann moun dann péi rish évite manj la vyann ansanm poisson, kansréti in sèl zour dan la somenn. Moin pèrsonèl, mi trouv sa in moun saz é bon konsèy. Si i ékoute pa li, sé sirman in késtyonn larzan ! A, la krintiv pou zot kont bankèr !

Vinn-troi kilo la vyann bèf pou abiye Lady Gaga

Lady Gaga, in shantèz, la vni donn in léspéktak abiyé èk vinn-troi kilo la vyann kri. Vinn-troi kilo la vyann kri, sa i fé dé san trante kilo mayi. Assé pou donn mil pèrsone in ropa... Domaz, an touléka, é nora mérite ali, demoun la pa bonbarde sa koute tomate pouri.

Justin


Kanalreunion.com