Oté

Gaspiyaz manzé : Lo gran gaspiyaz sistèm kapitalis !

Justin / 22 octob 2012

Mi sort lir kékpar dann Paris, banna la roganiz in manjé pou sink mil pèrsone. Na poin arien pou étone anou la-dan, pars ropa pou sink mil pèrsone, sa i pé fé in pé partou provi k’ou na larzan pou ashté la fournitir, kamarad pou donn zot kouraj, épi in bon l’organizasion. Sak lé pa parèy, dann féstin banna la fé dsi in gran shène télé, sé ké la prépar lo ropa avèk réstan légime, la vyann, lo frui, donk avèk in bonpé z’afèr té kondané pou gaté.

Pou kosa la fé sa ? Pars bann roganizatèr té i vé demoun i rann azot kont par zot mèm nana in bonpé gaspiyaz in pé dann tout péi. Dan La france, i prétan dir shak pèrsone i gaspiy ziska katrovin-sèz kilo la nouritir dann in n’ané. Kisa la fote ? La fote bann konsomatèr biensir pars lé pa fasil ashète sak i fo, arien sak i fo. La pa bézoin fé in désin mé moin lé sir demoun lé kapab konprann amoin. La fote bann gran sirfas osi pars i paré zot i mète an vant près désan pour san marshandiz zot i kont vann : donk na san pour san lé déstiné pou gaté.

Solman i pass pa d’zour san k’i di par si par la, la mizèr lé for, bonpé d’moun lé dsou lo sèy la mizèr. Mi sort lir, dsi la tèr, nana près nèf san milyon d’moun i manz pa pou ranpli zot vant. Bann gran sirfas i kontant azot kan zot i di zot i done in bon pâké bann z’asosyasion imanitèr, mé bann zasosyasion i pans zot i pé donn ankor in bonpé plis. Nana déssèrtènn shoz in pé i anparl pa kèr klèr : moin la mèm vi, na poin lontan dann in télé, demoun apré vèrs lo d’javèl dann bann poubèl pou anpèsh demoun vni rod manzé dan la nuit. Moin la vi osi, larg lo shien dsi d’moun kan i vien fouy dann poubèl.

 Justin 


Kanalreunion.com