Oté

Gingn la viktoir i apartyin pa ou, tyinbo zèrb ankor in kou !

Justin / 14 novembre 2009

Kan nou lété ankor marmay, kan nout bann korvé té pèrmète anou zoué in pé... bann fiy té i zoué la marèl, ti-kaz, dinète, sansa ankor danse-rone. Bann garson, touzour in pé brigan, té i préfèr bann zé pli brital : lou kouri, lou kashyète, kou d’pyé bourante, la krosh. A ! la krosh, sa té in n’afèr nou té i èm pou vréman. Manyé la fors, manyé l’adrèss, konm k’i fo, san gaspiyaz. Mé, pli vif, pli trète... in pé té i zoué volèr, té i réspèk pa lo règléman. Si l’androi nana zèrb é si zot lé dsi ou, kan ou i ponte pou ranvèrs ali, pou kalbite ali par koté, li tyinbo zèrb. Sa in n’afèr défandi, mé kan ou i fé sa, dann la sosyété marmay, pèrsone i zoué pi èk ou, pèrsone i vé pi ète kamarad avèk ou.
Lo tan la passé, nou la grandi, nou la rante dann la sosyété bann z’adilt, la sosyété gran moun, mé sak té volèr la rèss volèr, sak té onète la rèss onète... Sak té volèr la frode zéléksyon, l’ashète bann voi, la bour l’irn, la akoush la momon koshon. L’administrasyon mèm konplis èk zot, é bann moun onète la gingn lo kou, la rèss dann fon kanal. Konbyin konba la fé pou an avoir in pé la sinsérité, pou armète la sinsérité dann zéléksyon ? La lite la dir lontan. Zordi, i pé dir lé in pé myé, mé zot i pans pa ké sèrtin, dann fon z’ot kèr — volèr i rèss volèr ! — la poin l’anvi gingn bann konba zot i mérite pa, rofé in kou la frode. Konm k’i dire, dann la krosh, tyinbo zèrb ankor in kou pou gingn in viktoir i mérite pa zot.

Justin


L’ésplikasyon inn dé pti mo :

Ponté : fé lo pon pou ranvèrs le l’advèrsèr i pèz aou dsou

La krosh
 : in sorte lute la ropran favèr koméla

Kalbité
 : ranvèrsé (kal konm pass kal, é bité konm bite ansanm

Akoush la momon koshon
 : bour l’irn pou fé sorte in bon pé voi dodan (koshon i gingn bon pé pti)

L’administrasyon mèm konplis : dé foi, sé èl té fé la frode


Kanalreunion.com