Oté

Gliiiiii iiiii, yak-wo, Bibiip !!! La koup kann dann tan lontan !

Justin / 2 out 2013

Zot i koné kosa i lé sirandane ? Moin lé sir zot i koné pars sa i fé parti la kiltir popilèr. Donk si mi di : "Dolo pandant" moin lé sir zot va réponn amoin "koko", mé si mi di azot dolo dobout, a tou lé kou zot va di amoin "Kann". Sa i ramène anou dsi sak i konsèrn anou dopi kékzour. Sa i ramène anou dsi kann. mé antansyon, so kou isi, i port dsi la kiltir, dsi la vi, d’moun... nout vi dann tan lontan, dann tan la koup kann.
M’a dir azot in n’afèr, kann-la, sa té in n’afèr inportan pou nou, pou la mazorité bann Rényoné. Bann zadilt konm bann marmay. Pou nou, marmay dann tan apré la guèr, la koup kann sa lété in kékshoz pliské intérésan... Avèk zanvlop nou téi fé la roulète : dé pti lang zanvlop kann inn dsi l’ot kroizé ansanm épi dann milyé in pti trou. Dann lo pti trou in zik do boi é lo zik fiksé avèk lo tij flèr d’kann épi roul aou mon roulèt dan lo van. Désèrtin l’avé in sèl roulèt, d’ot l’avé in vré éskadriy la roulète, avèk kat, sink dsi l’orizontal épi kat sink dsi la vèrtikal é roul aou, fé dézord dan lo van. Anou ni sava la boutik — èk nout roulète. Ni sava lékol ansanm. Nou na dé minit dovan nou, alé in kou d’roulèt... Arzout èk sa ni mash kann gran matin, ni mash ali lo midi, l’apré midi, lo soir. Sa i kout pa arien vi k’ni trap dann karo, ni rash dann sharète, ni pandiy avèk kamion. Sa i kout pa arien épi sa lé dou, épi sa lé tann, pou sak i koné bien shoizi son kann, lo né, l’antre-né, tout ni anvoy… Sa lé dos, sa lé gayar, sa i blanshi lo dan, sa i done anou lénèrji. Kann nout bondyé dsi la tèr La Rényon.
Lé vré mon bann dalon, dann tan-la téi rode la paye... la pay kann biensir… I koup in pé lo bra mé nana fouraj an kantité é i pèrd pa lo tan pou rodé. In balo avan alé lékol, in balo apré la klosh katrèr, dé troi balo lo zédi, lo samdi, lo dimansh. San obli bann séo dolo. Mèm lo zour fèryé La flèr, Roujé, Fifine, sansa diabolo, zot i manj épi zot i boir d’lo, é sa travay marmay... Sak lé gran i koup kann, i sharj sharèt ou sinonsa kamiyon. Pandan la koup dopi moi d’zilyèt ziska moi d’désanm, sa té i mark nout vi. Bann shartyé i klak koud shabouk : gliiii, yak-wo, iiii… Bann kamion 2T5 Reno i klaksone dopi dan la nuite ziska lo soir : ii, yak-wo, bibiiip. Lo tan lontan, lo tan la koup kann, lo tan la koup kann dann tan lontan.

 Justin 


Kanalreunion.com