Oté

Gouvèrné sé prévoir, a s’ki paré !

Justin / 2 novanm 2011

L’avé in foi pou in bone foi, méssyé lo foi la manz son foi èk in grinn sèl !

Siklone Jenny : l’ané 1962 in siklone la pass déssi La Rényon. Bann z’ansien i souvien siklone-la, moin lé sir é sèrtin. Sanm pou moin li lété pa tèlman for. La pa dir bien lontan galman. Mé li la fé déga pars bann Rényoné la pa pran prékosyon konm k’i fo : la pa barikade la port épi la fénète, la pa kloute bann volé non pli. Sa in siklone l’ariv par sirpriz é domoun la pa rann azot kont asé d’tan avan. Solman la météo l’avé débisk ali. La préféktir lété o kouran z’afèr-la. Radio Sin-Dni ossi téi koné mé pa par la voi ofisyèl pars préfé té i vé pa k’i fé l’anons, k’i déklansh l’alert. L’èr-la, kan la déside donn l’alert lété tro tar. Rézilta : bann gro déga, nora gingn évité.

L’avé in foi, pou in bone foi, méssyé lo foi la manz son foi èk in grinn sèl !

L’insandi Maïdo : souvan dé foi kan dofé i déklar dann lé o l’ouèst, konm landroi lé sèk li bril a tou kassé. Lé konmsa dépi nana in kote èst épi in kote ouèst, in rééjyon nana bonpé la plui é in landroi nana moins. Dann tan avan, l’avé poin in bonpé moiyin pou batay kont dofé, alors le moun té i sibi l’afèr. Koméla, nana plis moiyin pou arète lo fé, pou étinn ali, touléka pou fé lo moins déga k’i pé. L’ané 2010 lo fé la bien détrui. Alors, kan lo fé la démaré na in pé plis k’in somenn, bann politik la di lo préfé, i fo pa plézant èk sa, pars i koné koman li démar é i koné pa bien koman kal ali. Mé lo préfé la réponn i fo adapt lo moiyin avèk la nésésité... L’èr-la la mète in bonpé d’moun pou tiin dofé, mé sa la pa inprésyone lo fé é sète-la la komanns détrui-détrui-détrui, ziska k’i ariv in vré dézas, é malérèzman, pétète, la pankor fini.

Gouvèrné sé prévoir, a s’ki paré !

Justin


Kanalreunion.com