Oté

Gouvèrné sé prévoir ? in bon prinsip mé dir pou apliké

Justin / 7 out 2014

Mi rapèl in kozman in vyé savan zaponé té ki di : « Si ou i vé arash in zèrb dann out zardin, poz aou pou komansé in késtyon sinp. Domann aou kosa li ansèrv ? Si li ansèrv de riyin ou i pé arash ali. ».. L’èr-la, kan mi ariv dann mon zardin mi arète pa poz amoin lo késtyon, mé san trouv in bon répons la plipar d’tan. Pars pou trouv in bon répons i fo ou lé kaziman in savan pou tout sak l’om la fine trouvé, pou sak in zour li va trouvé é pétète pou sak li trouv ar pa zamé. Donk mi fé konm mi konpran é mi domann amoin si moin la pa apré fé in l’érèr.

Pou kosa mi di sa ? La pa pou la késtyonn zèrb, sé pou tout késtyon an zénéral. In légzanp ? Kan la désid siprime lo trin isi La Rényon lo group kominis dann konsèy zénéral, mi rapèl i si lété Paul Vergès, ou bien défin Lapierre, ou in n’ot la di i fo pa fé sa, épi la di si i siprime lo trin gardien la voi pars sak i serv pa zordi, lé kapab ète bien itil domin. Biensir la pa ékout la voi la sazès ! Biensir la kas tout. Par plas la fé in shomin, par plas bann propriyétèr la kapar lo térin pou zot. Zordi, ni apèrsoi kèl kalité gro bétiz nou la fé.. ;Ni oi sana ni oi pa ankor bien, mé konm di lo kont ki vivra véra.

Final de kont, na in bonpé zafèr demoun i fé, san kalkilé, san réfléshi, san alé rod pli loin ké nout bout né.Konbien d’moun i vann zot tèr zordi pou artrouv azot sdf domin. Konbien gouvèrnman i pran désizyon an vitès épizapré i apèrsoi té pa in bon désizyon. Sak la pran la désizyon tyé Kadafi yèr, li doi poz ali késtyon zordi kan li oi la libye dann kèl trin i lé. Tyé Saddham hussein yèr, té fasil mé trouv in bon solisyon pou l’Irak zordi la pa in kréyon déyèr l’orèy.

Gouvèrné sé prévoir ? In bon prinsip mé difisil pou apliké.

Justin


Kanalreunion.com