Oté

Gouvèrné sé prévoir:OK ! Mé gouvèrné sé pa fé la pub dsi nout do !

Justin / 6 zanvié 2014

Kan mésyé Lurel l’ariv la préféktir, l’avé in pti manifèstasyon. Lo minis la pa pèrd son tan pou alé diskit in pé avèk banna, li la rant dirèk dann palé. La télé, pou son par, si mi tronp pa, la pa parti non pli diskit avèk bann maniféstan. Poitan, banna té i poz vré késtyon. Lakèl ?

Dabor inn pou di koman soisant uit zané apré la loi d’départmantalizasyon, la ankor bézoin fé vni in tralé d’moun La Rényon pou nou gingn ansort anou in pé késtyonn shomin, késtyonn lo, késtyonn léstrésité. Mèm lo minis la di, dann son l’aviyon l’avé sépa sinkant bononm, sépa katrovin bononm pou sokour anou. Koman soisant uit zané apré la loi d’départmantalizasyon nou lé randi ousa nou lé randi... Romark bien, bann manifèstan téi di pa sa zot ! Zot téi di nou lé kapab ansort anou par nou mèm !. Lé vré, lé pa vré ? Noré falu ékout azot, noré falu ékout bann z’asosyasion pou konète la solisyon, ébin la pa ékouté. An kontrèr la anvoy banna dingé !

Dann télé, moin la vi bann moun la protéksyon sivil i sort déor apré dégaj la rout avèk tronsonèz. Moin la di dann mon kèr : "tronsonèz nana sa isi ! Domoun pou manyé osi ! Alor pou kosa sé banna ké l’apré koup pyé d’boi ? Nana bann zasosyasion léspas vèr : banna i manyé sab, i manyé tout sort kalité zoutiy é bien sir bann tronsonèz. Alor, pou kosa la pa amontr banna dann shomin. Isi nan gran-gran lantropriz bien ékipé, ébin alor pou kosa la pa dmann banna in bon kou d’min ? Na in dalon la di amoin, nout péi lé si tèlman bien roganizé ké mèm dann bo tan, i gingn pa fèr fas bann problèm : nout kanal delo lé piké vèy pa koman, nout lign ote tansion i bouz konm la ké lo shien, nana in bonpé la rout mé zot lé pa fé pou gingn lo shok.

Lo shok ? kèl shok ? Biensir siklone té pa in zanfan tann, mé té pa non pli in for siklone. I di lo van la souf sansinkant kilomète an moiyène... Dakor, mé nou la fine konète lo van dé san katrovvin kilomète. Dolo l’avé an kantité ? Dakor mé la pa promyèr foi la plui i sharj konm panyé ppèrsé. La mèr té for ? Dakor mé la mèr for sa ni koné épa arienk zordi.

Sanm pou moin nou la bézoin réflèshi in bon kou pou trouv in plan pou mobiliz nout prop fors, é pou prévoir... Gouvèrné sé prévoir ok, mé gouvèrné sé pa fé la kominikasyon dsi l’do bann rényoné ! Konm dizé mon défin papa : lé tro tar pou sèré kan ou la fine fé dann dra.

Justin

NB Moin lé a d’mandé si tousala la pa ankor in manyèr fé konprann anou ni marsh ankor kat pat é sirtou pa dobout !


Kanalreunion.com