Oté

Hymne de la Bretagne - Bro gozh ma zadou ! Vyé péi mon bann z’ansète !

Témoignages.re / 10 mé 2014

Mi koné pa si zot la gard dann télé match fotbal Guingamp kont Rennes, in final la koup de Frans. Biensir, mi vé pa fé in kronik ésportiv, mé mi vé anparl azot sa kant mèm. Pou kosa ? Pou l’anbyans l’avé, mé dann lo lanbyans l’avé in kékshoz vanté... Dovan in ta èk in paké d’moun Nolwenn Leroy la shant l’ime La Bretagn... Sa i apèl « Bro ghoz ma zadou"- lo vyé péi mon bann z’ansète. Mon bann dalon, mi pé dir azot, sa lété for sa ! In zoli shantèz, apré shant in zoli shanté, dovan in ta èk in paké d’moun épi an parmi prézidan la répiblik fransèz.

Moin lété kontan pars bann breton zot osi i sort loin. Na lontan, dann bann batiman piblik lété fishé : lé défandi parl bréton épi krash atèr. Sa lé vré pou vréman é la poin in sèl internet pou done amoin tor. Mi jur !.. Mi koné galman pa toulmoun dann La Bretagn lé pou zot lang, lé pou zot kiltir, lé pou la rantré lo bréton dann l’ékol, mé moin lé kant mèm kontan oir lé shoz i avans pou lé zot. Pou kosa mi di sa ?

Pars nana touzour in lastik i ar-ral amoin dsi La Rényon. Isi osi lé shoz la avans in pé dann l’ansègnman, dann bann la méri, bann radyo é lo rès. Koméla ziska nana in drapo La Rényon dsi désèrtin batiman. Donk, sa i kontant amoin konm moin la fini di… mi trouv sa lé pozitif. Mi mète a rèv pou alé pli loin. Lé ga, akoz pa in l’ime pou nou ? Akoz pa in l’ime i kontant anou !... Pa in lo sikré d’shanté, pa in bann parol an tok épi in l’èr d’la mori griyé ; mé in vré shanson k’i pran nout kèr kan in kantité d’moun i shant ansanm. In ime pou nout réjyon, pou nout péi, pou nout nasyon ? Sa sré bon pou donn vitamine épi ranfors nout l’idantié, nout santiman d’ète rényoné, é sa sré in bon n’afèr !

In gayar l’ime pou shanté dann match fotbal, baskèt, sansa Andbal, épi galman dann bann fète i fé isi La Rényon, dann bann sérémoni ofisyèl Na. La marséyèz ! Akoz opa ! Mé galman konm di l’ot akoz pa la rényonèz ! Sa oui.

 Justin 


Kanalreunion.com