Oté

« I anbar pa la mèr èk in boushé d’paye ! » - In kozman pou la rout

Justin / 10 out 2015

La mèr, sa lé gran ! Si tèlman gran ké ou i gingn pa agard tout an mèm tan. In boushé d’paye sa lé pti. Donk, koman ou va fé pou anbar in gran z’afèr kaziman in z’afèr na poinn komansman é na poinn fin-li lé infini ! – avèk kékshoz lé pti.

Sa lé pa posib mé kan ou i asosyé bann kontrèr, sa i donn aou in bon moiyin pou mète an mémoir. Kosa na pou mète an mémoir la-dan ? Kékshoz sinp ! Si ou i vé trap in bi, i fo ou i mète lo moiyin k’i fo. Sa lé sir ! Si ou i mète pa, ébin la loi natirèl i vé ké ou i trap pa out bi. Si ou i mète pa lo moiyin konm di lo kont pou moiyéné…

Kosa zot i anpans ? Arien ditou ! Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète tazantan dakor rantre nou !


Kanalreunion.com