Oté

I antan pa kan i vé pa antann ! I oi pa kan i vé pa oir !

Justin / 7 octobre 2009

Mi pans bann politik la aksèpt vnir RFO pou in sobatkoz déssi in nouvo manyèr fé la politik la pa mète lontan pou konprann lo kalité d’zanbèk Éréfo la mète azot. Promyé késtyon mèm té i porte déssi la rouvèrtir, mode Sarko, épi la kontinyé konmsa dépi lo komansman ziska… moin la tinn télé.
In nouvo manyèr fé la politik ? Ala in bon késtyon ! Ala in bon sizé pou in sobatkoz ! Mé afèr alé rode la-ba in n’afèr nana issi dépi o moin mil nèf san sinkante nèf… l’ané Parti kominis rényoné lé éné. Pars dépi zour-la, nout parti la amène la politik in manyèr nouvèl. Zot i kroi pa moin ? Alon oir ansanm :
kèl parti i okip prinsipalman l’intéré La Rényon, san kont déssi baton tonton pou travèrs la rivyèr… si la pa nout parti ? Kèl parti i okip la politik, l’ékonomi, la kiltir, l’anvironman, le sosyal, la solidarité avèk bann z’ésploité toute péi, lo ko-dévlopman, si lé pa nout parti kominis ? Kèl parti i travay pa solman kan nana zélèksyon, mé toute l’ané, si la pa Parti kominis rényoné ?
Kèl parti la mète maloya anlèr, kabar anlèr, la lang kréol anlèr... kèl parti la domann bann Rényoné d’ète fyèr ? Kèl parti la domann son militan aprann listoir, si lé pa Parti kominis rényoné ? Arzoute avèk sa in n’afèr inportan, sé son volonté fé l’inyon rant bann moun La Rényon.
Sré tro lon pou mark sak PCR l’aporte konm nouvo dan la politik, konm nouvo manyèr oir la politik, konm fèr la politik. Sré tro lon, mé voila, na poin pèrsone i antan pa konm sak i vé pa antann, i oi pa konm sak i vé pa oir.

Justin



L’ésplikasyon inn-dé pti mo :

Sobatkoz : diskissyon

Zanbèk : in kal, in pyèz pou fé tonm l’advèrsèr

Kont pa si baton tonton pou travèrs la rivyèr : i fo kont déssi son prop fors

Amène la politik : fèr la politik

Kabar : in nuite pou shanté, pou dansé, an souvnans bann z’ansète… sèrvis kabaré


Kanalreunion.com