Oté

I apèl sa la lozik kapitalis !

Justin / 1 out 2015

Tanzantan minm si ou éstim ou rosan difikilté pou konprann, dé mié pa rod tro lésplikasyon. Zédi la Pos, in lantropriz piblik i anons in goumantation d’si lo pri tinm, in goumantasyon trwa virgil sis poursan pou promié zanvié 2016. Lavé déza goumanté sèt poursan promié zanvié 2015, donkalor sa i roprézant pliss de dis poursan pou in lané. La diréksyon la pos néna son lésplikasyon. Na pi tro tafik kouryé, domoun i tiliz mwin papié. O diton, pou asir la kontinité lo sérvis piblik é konm lo volim kouryé i bèss i fo goumant lo pri.

Minm moman Rono, in ot lantropriz piblik, séd la i konstri loto é lo lantropriz i anonss minm tan la pos, li anons que li doub son bénéfis pou lo promié somèss 2016. Zot va di, sa sé in bon nouvèl kni antann pa tou lé zour, mé mwin la pa antandi lo patron Rono di mi bèss in pé lo pri loto vik néna larzan, vik néna travay. Mi konpran pa poukoué i goumant lo pri tinm kan i pèrd in pé é poukoué i bèss pa lo pri loto kan i gingn in paké. Mi koz de sa èk in dalon, li di a mwin konm sa, sa i apèl la lozik kapitalis.

An plis pou la Pos, mon lozik a mwin soré plito bèss lo pri tinm konmsa i ankouraz domoun pou ropran papié. Sanm pou mwin, kan in nafèr i vann pi, i fo bèss lo pri, ousinonsa i sol pou mié vann. Sépousa mi di la bon o, mwin néna difikilté pou konprann souvan-dé-fwa. Donkalor la lozik kapitalis sé touzour lo minm ki gingn, é sé touzour lo minm ki gout. Konm sa minm lo zéguyi la balanss i tonm touzour minm koté, èk banna, lo zéguyi i tonm touzour koté drwat.


Kanalreunion.com