Oté

I aprann pa vyé sinj pou fé la grimas !

Justin / 16 février 2013

Dopi in pé d’tan bann jenn i vanj in pé partou. Kosa zot i domann ? In travay ! Sa in n’afèr lé rar konm korn lapin. Bann jenn, épi bann shomèr an jénérali i koné sa osi. In pé i di, i fo alé rode kontra èk la komine, d’ot i di i fo alé rode sa Konsèy réjyonal, sansa Konsèy zénéral. Biensir tout i pans nora moiyin grat-grat in pé, mé pèrsone i kroi pa va vni a bou fé kontra an kantité pou domoun dann shomaj. Pou sak la fine obliyé, mète bien dann zot koko dsi troi pèrsone an aj travayé, nana inn lé dann shomaj é sa i amènn anou avèk plis san soisant mil shomèr.

Kosa l’amenn anou dann malizé konmsa ?

Na in kantité rézon, mé sak lé lo pli résponsab sé la politik gouvèrnman dann nout péi. Kèl gouvèrnman ? In pé tout, gosh konm droit… In défo d’réfléksion ? Mi pans pa, pars bann Rényoné kisoi dann zot parti, kisoi dann zot sindika, kisoi dann zot z’asosyasion, kisoi ankor dann Konsèy réjyonal épi Konsèy zénéral la pa arète rode solision pou dévlop nout lékonomi, amélyor nout sosyété, ésèy éstop in pé lo shomaj. La plipar d’tan sé l’aplikasion la fé défo. In légzanp ? Kan Sarkozy la dévlop son program dsi lo dévlopman andojène i pé pa di té in mové program vik d’apré sak moin la konpri lo bi lété d’insèr La Rényon dann son l’anvironeman, kas in pé nout kordon onbilikal avèk la Frans. Mé la ministrèz l’Outre-mèr épi lo gouvèrnman li-mèm la pa konprann lé shoz konmsa. Zot la mèm konpri té i falé agrav ankor la politik néokolonyal. Sé sak in pé i kalkil, zordi ankor, i pans ankor zordi èk zot san, désan sansa troi san produi.

I sèy fé pran anou po d’shanm pou pla kouvèr, makaroni pou la bouji. I paré pou trap sinj i mète banane. Dann in zanr l’arozoir. La min i pass bien pou alé trapé, mé i arpas pi pou sorti. L’èr-la : sinj lé pri dann pyèj. Mé obli pa non pli lo patoi : i aprann pa vyé sinj pou fé la grimas.

Justin


Kanalreunion.com