Oté

« I ashèt pa koshon dann goni » - In kozman pou la rout

Justin / 10 désanm 2015

Dann tan lontan demoun la kanpagn téi ashèt pti koshon, pou anshèv la kroisans épi pou angrésé. Sa lété dann tan ou té i pé tyé out koshon dann out kour. Mi pans, koméla, i gingn pi fé z’afèr konmsa, sof an frod, donk komèrs ti koshon sé kékshoz la fine dékliné, mé avansa demoun té i trap lo pti zanimo, téi mète dann goni épi té i sava vann in pé partou dann tout shomin é dann tout santyé. Kan i ariv dovan out port i fo tir lo zanimo dann goni sansa ou I koné pa kosa ou I ashté. Majine in kou sa lé kontrofé, é lo vandèr la fine ariv loin ! Koméla i di ankor patoi-la, mé pou dir i fo pa fé konfyans n’inport ki pou n’inport koué. I fo méfyé kant mèm ! Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké rant-rant, ni pé z’ète, tazantan dakor rantre nou.


Kanalreunion.com