Oté

« I ashète pa koshon dann goni ! »

In kozman pou la rout

Justin / 24 zwin 2016

Donk, momandoné, nana in pé lontan, demoun téi mète tout sort kalité marshandiz dann goni : téi mète palmis, téi mète manyok, patat. Moin la mèm vi in pti goni ranpli avèk zoizo souké dsi baton kol (in détrès mi di azot !)… Dé foi, téi mète pti koshon dann gouni. L’èr-la majine in kou ou I sava ashète in pti koshon san oir ali. Sa nana son nonm dé pate k’i fo sa ? Sa na poin in défo d’nésans ? Nana de koi poz aou kèstyon mé sa I vé dir sinploman : méfyé aou d’in kékshoz ou i oi pa ! Méfyé aou in marshandiz kashyète dann goni, pars ou na sirpriz pou avoir é pétète pa bann bone sirpriz. Konm i di dann droi sivil in vant lé korèk si nana in z’akor dsi la shoz épi si lo pri. Si la pa sa, i fo anil lo vant. Alé ! ni artrouv pli d’van.

NB Kosa i lé in goni sansa gouni ? Sa in sak an toil trèsé avèk lo jute épi shoka (in pé I apèl sa sisal). Goni I vé dir “sak “dann la lang hindi-in lang dé l’Ind..


Kanalreunion.com