Lakey lo sit > Chroniques > Oté
“I ashté pa koshon dann goni !”-in kozman pou la rout
lindi 27 avril 2015, sanm
Zot i koné kosa i lé goni ? Dann tan, tout sak i mète zordi dann sak an plastik té i mète dan goni. Goni-la, sa in léspès gran sak-an toil dé jute-i di sa té i sort dann l’Inn. Touléka sa lété in n’afèr solid, épé vèy pa, é ou téi gingn pa rogard an travèr é té pa moiyin konète sak lété dodan…
Ala pou kosa, kan bann makiyon téi vann ti-koshon, zot té i mète dann goni é si zot lété in pé volèr, é si lo koshon lé in pé kontrofé, ébin zot téi vann aou sa, avèk lo goni épi zot téi bar. La sirpriz té pou ou ! Sé pou sa, kan ou i ashté in n’afèr, ou sinonsa kan i di aou in kékshoz, si ou i vérifyé pa, si ou i pran sa pou la vérité san pour san, ou i pé fé in l’érèr é ète kite pou out biskui.
L’èr-la, demoun té i di, ou l’ashté in koshon dann goni é sa lé pa dann out l’onèr ditou, par raport demoun i pran aou pou in gogoz.